Гьаму йигъари РД-йин образованиейинна илимдин министерствойиъ 2022-пи йисан хьадну баяр-шубарин сагъламвал уьбхбан кампанияйин тешкиллувалин месэлйир гьял апIру идарйирин арайиъ вуйи комиссияйи совещание кIули гъубхну.
РД-йин образованиейинна илимдин министерствойин пресс-гъуллугънаан къайд гъапIганси, совещаниейиъ РД-йин сагъламвал уьбхбан министерствойин, РФ-дин РД-йиъ айи МЧС-дин кIулин управлениейин, РД-йиъ айи Роспотребнадзорин управлениейин гъуллугъчйир ва бицIидарин сагъламвал уьбхбан лагерарин кIулиъ айидар иштирак гъахьну.
Комиссияйин вакилари совещаниейиъ жюрбежюр тешкилатар республикайин лагерарин реестрин гьисабназ гъадагъбан, вожатйирин кадрйи-рин ляхнин, тема жигьатнаан сменйир тешкил апIбан ляхин ккабалгувалин гьякьнаан вуйи ва жара месэлйириз гъилигну.
РД-йин образованиейин министерствойиан къайд апIурайиганси, лагерарин вожатйириз Дагъустандин образованиейин артмиш’валин институтдин бинайиинди курсар ачмиш дапIна. Думу курсариз дурушу вожатйир ляхниз кьабул апIурадар.
Мидланра гъайри, бицIидарин сагъламвал уьб-хбан лагерь ляхник кипбан бадали, думу лагерь майдин 1-пи йигъ улубкьайиз реестрин гьисабнаъ ади ккунду. Му вахтназ лагерь абццбан кагъзар гьязур апIуз хътруркьиш, думу хьадну ачмиш апIуз ихтияр тувудар.
Серенжемдин натижйириинди, гъийин йигъаз шагьрарихьан ярхлади ерлешмиш духьнайи, хьадну баяр-шубарин сагъламвал уьбхбан 28 ва мектебарин бинайиинди арццру 102 лагери реестриз чпин кагъзар хъадаъна.
