Улихьна йигъари Табасаран райондин глава Мягьямед Къурбанов РД-йин культурайин министр Зарема Бутаевайихъди гюрюшмиш гъахьну.
Гюрюшдиъ гьацира Гьюкуматдин табасаран драмтеатрин директор Аьлимурад Аьлимурадов ва Табасаран райондин администрация-йин культурайин, спортдин ва туризмдин управлениейин кIулиъ айи Аьбдулвагьаб Аьбдулов иштирак гъахьнийи.
Министрихъди вуйи сюгьбатнаъ табасаран культурайихъди аьлакьалу вуйи хайлин месэлйирин гьякьнаан гаф-чIал гъабхьнийи. Зарема Бутаевайи, Табасаран райондин культурайин месэлйириз дикъатлу фикир туври, аьхиримжи вахтна культурайин артмиш’вализ, цирклиъ шулайи ужудар дигиш’валариз, багъри культурайихъан юкIв убгувализ лигну, уч духьнайидариз чухсагъул мялум гъапIну.
Райондин культурайин управлениейи гъабхурайи ляхникан улхури, Мягьямед Къурбановди министриз аьхиримжи шубуд йисан культурайин цирклиъ гъубху ляхнин натижйириз бахш дапIнайи ва гьарсаб гъубху серенжемдикан, райондин культурайин дараматарикан мялуматар кайи буклет улупну. Райондин главайи министр багахь гележегдиъ му цирклиан гъахру ляхнарин планарихъдира таниш гъапIну. Асас вуди думу планар гьаму йисан Хючна гъулан ва Хьарагъ гъулан культурайин хулар рас апIуз ва райондиъ Республикайин халкьдин яратмишарин «Рубасдин мукьмар» фестиваль гъабхуз планламиш дапIнайивалихъди аьлакьалу вуйи.
Гюрюшдиъ райондиъ модельный библиотека арайиз хпан месэлара гъитIибкIнийи. Гъийин йигъаз дициб библиотекайиз райондиъ дарамат гьязур дапIна.
Сюгьбатнаъ Гьюкуматдин табасаран театриз цIийи дарамат дивбан месэлара за гъапIнийи.
Театрин директор Аьлимурад Аьлимурадовди учуз туву мялуматариинди, театрин тикилишчивалин ляхнар гъябгъюрайи йисан ккергъбанди ву.
«Табасаран театрин цIийи дарамат гьамусяаьт театр али йишв’ин тикмиш апIиди. Театр Дербент шагьрин гьацIкьялаъ айи ужуб йишв’ин ерлешмиш дубхьна. Думу йишв деебтудархьа. Зарема Ажуевнайи ич гюрюшдиъ гъапиганси, культурайин министерствойи проектдинна сметайин кагъзар ва госэкспертизара гьязур дапIну сад йискьан ву. Гьяйифки, гьамусяаьт гъягъюрайи гьядисйирихъди ва ихь уьлкейиин иливурайи санкцйирихъди аьлакьалу вуди театрин сягьнайи-ин чарасуз лазим вуйи акв, сес тувру ва жара аппаратурайин гьякьнаан читинвалар арайиз дуфна. Думу вари аппаратура Европайиан хурайиб ву. Гьамусяаьт министерство Азияйин рынокдиз удубчIвуз мажбур гъабхьну, лазим вуйиб гьадушв’ан масу гъадабгъруганси. Гюрюшдиъ театрин тикилишчивалин ляхнарихъ закур хъюгъру, саритI хъюгъру кIури, кьатI’и жаваб тувундар, хъа министри думу месэла чан улихь хьайи сабпи месэлйирикан вуйивал къайд гъапIну», – гъапнийи Аьлимурад Аьлимурадовди.
Гюрюшдиъ Зарема Бутаевайи чав Табасаран райондин культурайин циркил артмиш апIру вари цIийи рякъярин ва фикрарин тереф уьбхюз ва дурариз кюмек тувуз вуйиваликан гъапну.
