Гьамусяаьт ихь уьлкейиъ хайлин харижи уьлкйири ухь’ин санкцйир иливнайивал себеб вуди, масу туврайи, инсандиз варитIан лазим вуйи ипIру-убхъру сурсатарин кьиматар йигълан-йигъаз за шула. Думу сурсатар масу туврайидарихьан кьиматар гьаз за шулаш гьерхган, дурари, чпи тахсиркрар дарча, чпира му сурсатар багьа кьиматназ масу гъадагъурача кIури, жаваб тувра.
Узу мюгьтал апIурайиб гьадму вуки, гьаз ихь региондиъ гьясил апIурайи картфарин, келемдин, гулйирин, йи-ккун ва никкдин кьиматар гьамкьан за духьнаш?! Гъийин йигъан саб килойихъ исккан гьисаб 50 манат тувну, картфар масу гъадагъуз касиб хизанариз лап гъагъиди ву. Гьаз алверчйири ихь ватандашариин мукьан рихшанд апIура, гьаз дурарик мици кялхъра?! Даршсана инсанар гаш’валиъ ахьну гъитуз ккундайин?
Масу туврайи ипIру-убхъру сурсатарин кьимат за апIбан мициб гъагъи аьгьвалат саб ихь республикайиъ ваъ, хъа Урусатдин хайлин регионариъ арайиз дуфна.
Региондиъ ипIру-убхъру сурсатарин кьиматар за хьпахъди аьла-кьалу аьгьвалат республикайин Правительствойи чан гюзчиваликкна гъадабгъна. Айи мялуматариинди, республикайиъ ипIру-убхъру сурсатарин кьитвал адаршра, кьиматар за шула. Мисал вуди гъадабгъиш, саспи туканариъ саб гюмбейин кьимат саки 50 манатдихьнакьан за дубхьна, хъа саспи йишвариъ 27-29 манат ву. Уьлихъди сабси йиккун, никкдин, мейвйирин ва йимишарин кьиматарра за духьна. Гъийин йигъан кьялан гьисабариинди саб кило малин йикк 400 манатдиз масу тувра. Гьаци хюйин, шекрин ва йимишарин кьматарра швнуб-саб ражари за дапIна. 25 кило айи хюйин шишлин кьимат 1 агъзур манатдихьна за дапIнайи йишварра рякъюра.
Республикайин Правительствойин пресс-гъуллугънаан тувнайи мялуматариинди, региондин Глава Сергей Меликовдин тIалабниинди, гьамусяаьт уьлкейиъ айи гъагъи аьгьвалатнахъди аьлакьалу вуди, региондиъ ипIру-убхъру сурсатарихъди тямин ва кьиматар за апIувалин зиин гюзчивал гъабхуз Оперативный штаб тешкил дапIна. Мидланра гъайри, Главайин табшуругъниинди, региондин гъулан мяишатдин ва ипIру-убхъру сурсатаринна промышленностдин ва ариш-веришчивалин министерствйири, УФАС-ди, чарасуз лазим вуйи ипIру-убхъру сурсатарин кьиматарин мониторинг гъабхбан бадали, эгер кьиматар за дапIнайи туканар ашкар гъахьиш, дурарикан мялумат тувуз республикайин цифрайин артмиш’валин министерствойиъ гьар йигъан гвачIнинсяаьт 9-диан хьябяхъдин сяаьт 7-дизкьан зенгар кьабул апIурайи телефондин «убцру линия» ачмиш дапIна.
Эгер учву кьиматар за духьнайивалин шагьидар гъахьиш, гьяракатниинди 98-97-76 телефондин нумрайиз зенг апIинай ва наан кьиматар за дапIнаш мялумат тувай.
