Владимир Путинди Урусатдин Яракьлу Кьувватарикан кучIлин мялуматар тарагъурайидариз ва ихь гьюкуматдиз аькси санкцйир кьабул апIбахьна дих апIурайидариз жаза тувбан гьякьнаан къанундиин къул гъизигну.

 

Къанундиз асас вуди, ихь уьлкейин ва дидин ватандашарин игьтияжар гьуркIбан ва гьацира халкьарин арайиъ ислягьвал ва хатIасузвал уьрхбан бадали, чпиз кучIлин хабрар вуйибра аьгъяди, Урусатдин Яракьлу Кьувватарин гьякьнаан, пис кьаст дапIну, яркьуди кучIлин хабрар тарагъувалин тахсиркарвал гъапIдар жазайикк ккахьди.

Къанунди гьацира Урусатдин Федерацияйин армия халкьарин арайиъ ислягьвал ва хатIасузвал уьбхбан метлеб ади жалб апIбаз аьксивал улупбан гьяракатар гъахувалра жазаламиш апIиди.

Му документдиз асас вуди, Урусатдин Яракьлу Кьувватарин гьякьнаан чпизра аьгъяди кучIлин мялуматар тарагъувализ 700 агъзурилан 1,5 миллион манатдихьна журум вая шубуд йисазди дустагъ апIувалин жавабдарвал улихь ккимиди назарназ гъадабгъна. Гьадму саб вахтна, чпин гъуллугънан ихтиярар ишлетмиш апIури, саб десте касари кучIлин мялуматар гьязур апIбаз ва дурар яркьуди тарагъбаз 5 йислан 10 йис’ина дустагъ апIбан жаза улупна. КучIлин хабрар тарагъувалиан гъагъи натижйир арайиз гъафиш, 10 йислан 15 йис’инакьан дустагъ апIиди.

Мидланра савайи, му къанундиз асас вуди, Урусатдиз, дидин ватандашариз ва юридический касариз санкцйир кьабул апIуз дих апIурайи харижи гьюкуматар, думу гьюкуматарин вая уьлкйирин арайиъ вуйи тешкилатарра жавабдарвалихьна хиди.

4-пи мартдиъ РФ-дин Федерацияйин Советди пленарный заседаниейиъ урусатдин армияйикан кучIлин мялуматар тарагъувализ жаза гьадабтIбан гьякьнаан къанун кьабул апIбан тереф гъюбхну.