Республикайиъ налогар тувбан ляхин лап явашди давам шула.

 

 

Гьаци гъи йисандин эвелиз Дагъустан Республикайиъ физический касари чпиз айи девлет-хазнайилан тувну ккуни налогдин буржнан кьадар 7,8 миллиард манат ву. Гьадму кьадарнакан 5,4 миллиард манат транспортдилан тувну ккуни налогдин бурж, 1,5 миллиард – жилилан туврайи налог ва 945 миллион – девлет-хазнайилан вуйи налогдин бурж ву. Му мялуматар учуз Федеральный налогарин гъуллугънан Дагъустандиъ айи управлениейин гъуллугъчи Багьаудин Аьлиевди тувну.

– Налогар тутрувди, зиихъ къайд дапIнайи кьадар буржар республикайин агьал-йирихъ хъахьнайивалин асас себеб – инсанар налогар тувну ккунивалин гъавриъ адрувал ву. Хайлин ихь ватандашари, налог тувну ккуниваликан мялум апIури, чпиз гъюрайи кагъзариз фикир тутрувди гъитра, ва гьацира, шубуд йис улдубчIвиган, кайи налогдин бурж ктIубшвуру кIури, дюз дару, гъалатI вуйи фикир апIура, – къайд гъапIну республикайин налогарин Управлениейин гъуллугъчийи.

Багьаудин Аьлиевди гъапиганси, республикайиъ физический касари тувну ккуни налогар вахтниинди тувбаан улихь хьайи муниципалитетар СтIал Сулейман, Къурагь, Гъяйтагъ, Магьярамкент, Дукъузпара, Табасаран, Хив ва Агъул районарна Дагъустандин Огни ва Къизлар шагьрар ву. Хъа налогар уч апIбан ляхин варитIан явашди гъабхурайи муниципалитетар: Леваши, Акъуша, Къарабудагъкент, Шамил, Тлярата, Казбек, Хасавюрт, Буйнагъск, УнцIукIул районар ва Буйнагъск шагьур ву.

«Бюджетдиз налогар тувбан ляхин явашди вуйивализ лигну, налогарин гъуллугънан гъуллугъчйири, суддин приставари ва полицияйин вакилари сатIиди гъубху ляхнин натижайиинди, гъубшу йисан бурж кайидарин девлет-хазнайин 7,4 миллион манат удубчIвру 238 шейъ гъидисну. Мидланра гъайри, буржлу касарикан, суддин актариз асас вуди, 148,5 миллион манатдин налог ктабгъну.

Гьамцдар дюшюшар дархьбан бадали, республикайин агьалйирикан тувну ккуни налог ва чпик кайи буржар вахт-ниинди тувуб ккун апIураза», – аьлава гъапIну Багьаудин Аьлиевди.