Гьамусяаьт уьлкейиин иливнайи санкцйирин аьгьвалат гъагъиб вуйивализ ва яшайишдиъ чарасуз лазим вуйи сурсатарин кьиматар за шулайивализ лигну, Дагъустандин гъулан мяишатдин ва ипIру-убхъру сарсатарин министерствойи ярмаркйир тешкил апIуз планламиш дапIна.

 

 

Улихьнаси Урусатдин Президент Владимир Путиндихъди ВКС жюрейиинди кIули гъубшу совещание-йиъ Дагъустандин Глава Сергей Меликовди, республикайиъ кьюб-шубуб вазлин арайиъ гъулан мяишатдин сурсатар масу тувру ярмаркйир гъахбакан мялум гъапIну. Ярмаркйир шагьрариъси, районариъра 20-пи мартдихъан гъахьуз хъюгъди. Багарихьди вуйи ярмарка Гумбет райондиъ тешкил апIура. Думу ярмаркйириъ ихь региондиъ гьясил апIурайи гъулан мяишатдин сурсатар багьади дарди масу гъадагъуз мумкинвал хьибди.

Ярмаркйир тешкил апIбан ва дурариъ иштирак хьпан гьякьнаан Табасаран райондин администрация-йин гъулан мяишатдин отделин начальник Аьгьмед Аваевдихъди ва Хив райондин администрацияйин гъулан мяишатдин отделин пишекар Султан Аваевдихъди гаф-чIал гъапIнийза.

Аьгьмед Аваевдин гафариинди, гьелелиг ярмаркйириъ иштирак хьуз вая ярмарка гъабхуз Табасаран райондиъ гъулан мяишатдин фасларин сурсатар гьуркIуна адар. Хъа хьадну ярмаркйир гъахбан планариъ Табасаран районра улупна.

«Ярмарка даршра, райондиъ айи МФЦ-йин филиалин аьтрафариин, гьар йигъан, райондин агьалйири гъулариан гъюри, чпин сачдиан мина гъузнайи гъулан мяишатдин сурсатар асккан кьиматназ масу тувра. Дина муштарйир гъюри, сурсатар гъадагъура», – гъапну йиз сюгьбатчийи.
Хъа Султан Аваевди туву мялуматаринди, гьаму гьяфтайиъ Гумбет райондиъ кIули гъябгъру ярмаркайиъ Хив район иштирак даршулайивалин себеб – районар чиб-чпихьан лап ярхлади ерлешмиш духьнайивал ву.

«Хив район республикайиъ тешкил апIурайи саки вари ярмаркйириъ иштирак хьуз гьаммишан гьязур ву. Гъюру гьяфтайиъ Дербентдиъ планламиш дапIнайи ярмаркайиъ иштирак хьуз пландик кайич. Хъа райондиъ ярмарка апрелин аьхирариъ вая майдин эвелариъ гъабхбахьнара яваш-явашди гьязур шулача», – аьлава гъапIну Султан Аваевди.