Мялум вуйиси, Украинайиъ гъягъюрайи гьядисйирихъди аьлакьалу вуди душваъ дуланмиш шулайи аьдати агьалйирин яшайиш лап читин дубхьна. Дявдин гьяракатар гъягъюрайи шагьрариъ-районариъ ипIру-убхъру сурсатарихъди, дармнарихъди ва жара лазим вуйи шей’арихъди гъагъи гьял арайиз дуфна. Му читин вахтна дурариз кюмекнан хил гьачIабккури, ихь уьлкейиан Украинайиз тоннариинди жюрбежюр сурсатар айи машинар зат яваш дарди гъягъюра.
Гьаци аьхиримжи йи- гъари Мариуполиз кюмек вуди 450 тонна ипIру-убхъру сурсатар, дармнар, сабпи нубатнаъ лазим шлу шей’ар хътаъну. Гьаддин гьякьнаан РФ-дин оборонайин Милли центрин кIулиъ айи генерал-полковник Михаил Мизинцевди мялум гъапIну.
Дугъан гафариинди, аьхиримжи йигъари Мариуполиъ азад гъапIу агьалйирира шагьриъ миллетчйири гъахури гъахьи инсафсузвалин гьяракатар тасдикь гъапIну.
Гьаму йигъари Киевдин гъвалахъ хъайи гъуларизра урусатдин дявдин гъуллугъчйири 40 тонна гуманитарный кюмек хьади гъушну. Киевский областдин вари кафари тереф украинайин гьюкмари электрикдин аквнахъ мягьрум дапIна.
Мидиз улихьна, Донецкдин ва Луганскдин халкьдин рес-публикйириан Крымдиз гьергну душнайи агьалйириз кюмек вуди, Дагъустандианра 80 тонна жюрбежюр сурсатар хътаъну. Му акция-йиъ дагъустандин гъулан мяишатдин сурсатар гьясил апIрудар вари иштирак гъахьну. РД-йин премьер-министр Аьбдулмуслим Аьбдулмуслимовди къайд гъапIганси, сифте вуди ухди чIур даршлу сурсатарин – хюйин, шекрин, консервйирин ва гь.ж. шей’арин кюмек тешкил гъапIну. «Му жюрейин акцйир республикайин Правительствойи давам апI-банди ву. Дагъустанлуйир читинвалиъ айидариз кюмекнан хил гьачIабккуз гьар вахтна гьязур ву. Гьамусра вариди сабишв’инди Донбассдиан удучIвну гъягъюз мажбур духьнайи агьалйириз кюмек тувур кIури, умудлу вуза», – гъапну премьер-министри.
«Саб вуйи Урусат» партия-йин региондин отделениейиъ къайд гъапIганси, му ляхин муниципалитетарихъди, ерли гьюкмин органарихъди, жямяаьтлугъ тешкилатарихъди, депутатарихъди, меценатарихъди, рягьимлувалин фондарихъди ва читин гьялнаъ айидарихьна вижнасузвалиинди янашмиш хьуз даршлу дагъустанлуйирихъди сатIиди гъабхурайиб ву.
РД-йин Халкьдин Собра-ниейин «Саб вуйи Урусат» фракцияйин депутатари ва партияйин активистари, ДГПУ-йин мялимари гьергну душнайидариз кюмек вуди сад йигъандин маважиб хътапIну.
ДНР ва ЛНР республикйириз читин йигъар дуфнайи вахтна Табасаран райондин агьалйирра гъирагъдиъ гъузундар. 15-пи мартдиъ администрацияйиъ гъабхьи совещаниейиъ райондин глава Мягьямед Къурбановди къайд гъапIганси, му рягьимлувалин теклифнан тереф дюбхну, бицIи вахтнан арайиъ райондин тешкилатари, карханйири ва алверчйири саб кьадар пул уч гъапIну. Дидихъ чарасуз лазим вуйи шей’ар масу гъадагъну, вари районариан-шагьрариан гуманитарный кюмек уч апIурайи республикайин пунктназ хътаиди.
Ростовский областдиъ айи Донбассдин агьалйириз кюмек вуди «Инсан» рягьимлувалин фонднура саб-кьюб гьяфтайин арайиъ 60 тонна яшамиш хьуз сабпи нубатнаъ лазим вуйи шей’арин кюмек гъапIну. Му фондну тешкил апIурайи кьюбпи тялукь акция ву.
