Мартдин 21-пи йигъан Москва шагьрин Тверской судди адабгъу къарариз асас вуди, Урусатдин аьтрафариин гьяракатнаъ айи америкайин Meta Platforms Inc компанияйин Facebook ва Instagram социальный сетар экстремиствалин гьяракатар тарагъурайидарси гьисаб гъапIну. Ва думу социальный сетарианмина инсанар экстремиствалин гьяракатар кIули гъахбахьна жалб апIурайивал гьисабназ гъадабгъну, РФ-диъ думу сетарин ляхин дебккбан къарар адабгъну.
КIваин апIуз ккундучуз, цIиб улихьнаси РФ-дин Генпрокуратура Meta компанияйин гьякьнаан тялукь мялумат хьади, дидин ляхин дебккувал ккун апIури, суддиз илтIибкIнийи. Генпрокуратурайи тасдикь гъапIганси, Meta компанияйин Facebook ва Instagram социальный сетари Урусатдин Федерацияйин агьалйириина аьрвалар, зулмар хуз, ихь уьлкейин инсанар йивури йихуз дих апIбан мялуматар ва видеороликар чап апIура.
Прокуратурайи къайд гъапIганси, му кьюбиб социальный сетар ишлетмиш апIурайи инсанар жавабдарвалихъна хурдар, амма Facebook ва Instagram социальный сетариъ реклама масу гъадабгъдар, экстремистарин гьяракатариз финансарин кюмек тувбан гьякьнаан уголовный маддайиз асас вуди, уголовный жавабдарвалихъна хиди. Му Meta компанияйин акцйир масу туврайидариз вая масу гъадагъурайидаризра кайиб ву.
Facebook ва Instagram социальный сетарилан гъайри, WhatsApp мессенджерра Meta компанияйин дахилнаъ айиб ву, Амма му мессенджериин судди къадагъа иливнадар.
Суддин къарариинди, Meta компанияйиз РФ-дин аьтрафариин хусуси отделенйир арццуз къадагъа дапIна, гьацира дидиз я реклама масу тувуз, я саб жюрейинра йикьрар йитIуз ихтияр адар. Судди кьюбиб социальный сетар чарасуз вуди гьамусяаьт хъяркьбан гьякьнаан къарар адабгънашра, Meta компанияйиз апелляцияйин аьрза тувуз саб вазлин вахт ими. Хъа му компания экстремиствалин тешкилатарин сиягьназра му вахт улдубчIвбан кьяляхътIан гъадабгъидар.
Инстаграм ва Фейсбук ишлетмиш апIуз шулин? Гьаму суал гъи хайлиндари тувра. Ав, шулу, амма теория жигьатнаан дурар ишлетмиш апIрудар жавабдарвалихъна хуб мумкин ву. Суддин къарар адабгъну, саб ваз улдубчIвбалан кьяляхъ, гьюкмин кIулиъ айидари App Store ва Google Play Store магазинарикан Facebook ва Instagram приложенйир батIул апIувал ккун апIиди. Дурарин логотипарра экстремиствалиндарси гьисаб апIиди. Гьаддиз думу логотипар ичв социальный сетариан вахтниинди адагъай. Мидланра гъайри, Meta социальный сетариина ссылка туври гъахьиш, КоАП-дин 20.3 маддайиз асас вуди, жавабдарвалихъна хуру. Гьамусдихъантина думу социальный сетарикан улхруган вая дурарикан бикIруган, дурарин кьяляхъ скобкйириъ, РФ-диъ къадагъа дапIнайи тешкилат кIури, дибикIну вая текстнан аьхириъ къайд дапIну ккунду.
