Ихь жигьилари багъри чIалниинди жвуван миллетдин аьдатар улупбан конкурсдиъ йишв гъибисну кIуру хабар гизаф рази апIруб ву. Фицики гъи жигьил насил багъри чIалнахьан ва аьдатарихьан ярхла шулайиваликан варидариз фикир кахьуз.

 

 Февралин ва мартдин вазариъ Дербент шагьрин мектебарин, ссузарин ва вузарин арайиъ «Багъри чIал – халкьдин рюгь» ччвур тувнайи фестиваль-конкурс кIули гъубшну. Му фестиваль-конкурс Урусатдин халкьарин культурайин ирснан йисаз бахш дапIнайиб вуйи. Конкурсдин программа 7 номинацияйикан ибарат вуйи.

Дагъустан халкьарин аьдатар улупбан номинацияйиъ сабпи йишв табасаранарин риш хъаъругандин аьдатар улупу Дербентдин Гь.Къазиаьгьмедовдин ччвурнахъ хъайи педколледждиз ва азербайжан халкьдин «хина иливуб» кIуру аьдат улупу Дербент шагьрин 16-пи нумрайин мектебдиз тувну. Дербентдин педколледждиъ чпин хиликк урхурайи студентар гьязур гъапIдар колледждин табасаран чIалнан мялимар Ирина Къалабегова ва Аида Насурова вуйи. Конкурсдин жюрийи студентари бабан чIалниинди марцциди гафар апIурайивализ, дурариз сумчрин мяълийир аьгъювализ, риш хъаъругандин аьдатар машгъул апIру саягъ ва девлетлуди улупуз удукьувализ заан кьиматар дивну ва жигьилар гьамци багъри ирсниин машгъул дапIнайи мялимариз чухсагъул гъапну.

 

Шиклиъ: Дербентдин Гь.Къазиаьгьмедовдин ччвурнахъ хъайи педколледждин студентари сягьнайиин риш хъаъругандин аьдатар улупури.