Гъябгъюрайи йисан апрелин 2-пи йигъан вари республикайиъ имтигьнар тувру пунктариъ «СатIиди туврухьа. Абйир-бабари ЕГЭ тувру йигъ» акция кIули гъябгъиди. Гьаму йисан имтигьнин иштиракчйири математикайиан бинайин дережайин ЕГЭ тувди.
Акция мектебдин выпускникарин ва абйир-бабарин ЕГЭ-йихьна вуйи гьязурлугвалариъ психология жигьатнаан арайиз гъюрайи гъалабулугъвал терг хьуз гъитбан ва жямяаьтлугъ имтигьян кIули гъабхбан къайдйирихъди багахьди таниш апIбан метлеб ади гъабхурайиб ву.
ЕГЭ тувуз гъюрайидари варидари имтигьнин улихь тамам дапIну ккуни гьяракатарин къайда уьбхиди: регистрация апIиди, хусуси шей’ар ва телефонар вахтназ вуди мялимдихьна тувди, имтигьниз улихьна вуйи гюзчивал гъабхиди, бланкар ацIди. Абйир-бабар, имтигьниин фици гюзчивал гъабхураш, эпидемиологияйин хатIасузвал уьбхру фицдар уьлчмйир кьабул, имтигьнин материалар фици чап ва тартиб апIураш, таниш хьиди.
Акцияйин иштиракчйири ЕГЭ-йиъ выпускникари тувру табшуругъариз ухшарвал айи табшуругъар ва мисалар гьял апIиди. Му ляхин аьдати ЕГЭ-си 3-4 сяаьтнан арайиъ кIули гъябгъидар, фицики табшуругъарин кьадар кам дапIна ва дурар гьял апIуз саб сяаьтнан вахт тувди.
Абйир-бабаризси му имтигьниъ СМИ-йин вакиларизра иштирак хьуз ихтияр а. Абйир-бабари, ЕГЭ-йиъ иштирак хьпан бадали, 30-пи мартдиз РЦОИ-йин сайтдиъ регистрация дапIну ккунду.
Имтигьнин кьяляхъ РД-йин образованиейинна илимдин министерствойин вакиларихъди «2022-пи йисандин ЕГЭ-йин тешкиллувалин цIийивалар» темайиан конференция гъябгъиди.
Къайд апIуз ккундучуз, вари Урусатдин «Абйир-бабари ЕГЭ тувру йигъ» акция образованиейин ва илимдин цирклиъ гюзчивал гъабхурайи федеральный гъуллугънан жягьтлувалиинди тешкил дапIнайиб ву. 2022-пи йисан му акция 6-пи ражари гъабхура.
