Мартдин 25-диъ, вари уьлкейиъси, Табасаран райондиъра культурайин гъуллугъчийин йигъ къайд гъапIнийи. Думу йигъаз тялукь вуйи серенжем райондин культурайин, спортдин ва туризмдин управлениейин директор Аьбдулвагьаб Аьбдуловди ачмиш гъапIнийи. Чан удучIвну улхбаъ дугъу, вари йишвариъси, Табасаран райондиъра культурайин ядиграр уьрхюрайиваликан, дегьзаманйирианмина ухьухьна дуфнайи ихь халкьдин искусствойин эсерар, дюрхну, артмиш дапIну, гележегдин насларихьна дурукьну ккуниваликан гъапнийи.

 

 

Культурайин гъуллугъчйир пишекарвалин машкврихъди мубарак апIуз му серенжемдиз гьацира Табасаран райондин глава Мягьямед Къурбанов, РД-йин Халкьдин Собраниейин депутат Алавудин Мирзабалаев, Табасаран райондин депутатарин собраниейин председатель Иса Исаев ва Табасаран театрин директор Аьлимурад Аьли-мурадовра дуфнайи.

Табасаран райондин глава Мягьямед Къурбановди культурайин цирклин гъуллугъчйир чпин пишекарвалин йигъахъди мубарак гъапIнийи. «Ихь халкьдин аьдатар уьрхбан бадали, культурайин гъуллугъчйири аьхю зегьмет зигура. Аьхиримжи вахтна райондиъ культурайин идарйир къайдайиз хуб жигьатнаан хайлин ляхин дубхна. Республикайин культурайин министерствойира думу месэла гьял апIуз гизаф кюмек тувра. Мисалназ, ТинтIарин, АхьтIарин, Улзарин ва Хили-Пенжигьарин культурайин хулар дибдиан рас дапIна, Табасаран райондин культурайин хулазра хайлин лазим вуйи шей’ар масу гъадагъна.

2022-пи йисан федеральный программайиинди Табасаран райондин культурайин хал ва Хьаргъарин культурайин хал дибдиан рас апIуз, гьацира музейдизра лазим вуйи шей’арна алатар масу гъадагъуз планламиш дапIна.

Гъябгъюрайи йисан культурайин цирклиз бюджетдиан пулин гизаф дакьатар жара апIиди, гьаддиз дурариз гъилигу ляхинра дубхну ккунду. ДапIнайи ляхниин дийигъбанди дарча, гъюру йисарира культурайин хулар къайдайиз хпан ляхнар давам дапIну ккунду», – ктибтнийи М.Къурбановди.
Культурайин ляхниъ гъазанмиш гъапIу хъуркьувалариз лигну, Табасаран райондин глава Мягьямед Къурбановди саб жерге пишекрар гьюрматнан грамотйир ва чухсагъул мялум апIбан кагъзар тувбиинди лишанлу гъапIнийи. Дурарин арайиъ Табасаран райондин культурайин, спортдин ва туризмдин управлениейин директорин заместитель Эстенгер Халилов, райондин культурайин отделин начальник Арсен Асланов ва пишекрар ТIейиб Рамазанов, Рустам Рамазанов, Тельман Аьбдуллаев, Оксана Ибрагьимова; Табасаран райондин Кьасум Мягьямедовдин ччвурнахъ хъайи мектебдин директор Исмяил Исмяилов ва пишекрар Рашид Рашидов, Нури Рашидов, Рашид Зубаилович Рашидов, Ражаб Клинжев; ТIюргъяринна ТIиварин культурайин хуларин директорар Сураят Гьяжикеримова ва Нигьаят МутIалимова, Пилигъ, Кюрягъ ва Гурхун гъуларин культурайин хуларин художественный руководителар Наида Исмяилова, Аьбдукерим Керимов, Сафри Аьбдуллаева айи.

Алавудин Мирзабалаевдира культурайин гъуллугъчйир пишекарвалин йигъахъди тебрик гъапIнийи. «Гъи гьюкуматди культурайин цирклиз, дидин проектар артмиш апIбан бадали, хайлин дакьатар жара апIура. Ухьу мицдар мумкинвалар ишлетмиш дарапIди гъитну ккундар, ихь культурайин идарйир къайдайиз духну ккунду.

Табасаран халкьдин культурайин тарих лап аьхюб ву. Гъулариъ айи культурайин хулари, ихь аьдатар, та- рих уьрхбан бадали, зегьмет дизигну ккунду», – гъапнийи дугъу.

Табасаран театрин директор Аьлимурад Аьлимурадовдира гъарашугъар пишекарвалин машкврихъди мубарак гъапIнийи. Дугъу, 2021-пи йисан Табасаран райондин культурайин хулариъ фици ляхин гъабхураш ахтармиш апIбан бадали, дюзмиш гъапIу комиссияйин ляхин натижйирикан ктибтнийи. «Саспи идарйириъ айи пишекрари, фициб читин гьялнаъ ашра, чпин вазифйир лап дикъатлуди тамам апIурайи, хъа саспидарин ляхин гъябкъиган, нач шуйи. Ичв ляхин улихь гъябгъбан бадали, дидин кIакIначйир учву духьну ккунду», – къайд гъапIнийи дугъу.