Мартдин 29-пи йигъан Дагъустандин Глава Сергей Меликов Украинайин аьтрафариин гъябгъюрайи хусуси метлеб айи операцияйиъ чпин гъуллугънан буржи тамам апIури гъийиху дагъустанлуйирин багахьлуйирихъди гюрюшмиш гъахьну.
Сергей Меликовди, гъийиху эскрарин багахьлуйириз дерин пашманвал мялум апIури, Дагъустандин вакилари улупу дирбаш’валикан гъапну: «Дурари чпин буржи, фашизмдихъди женг гъубху чпин абйириси, жилирвалиинди, дирбаш’валиинди тамам гъапIну. Дурар Аьхю Гъалибвал гъадабгъдарин лайикьлу наслар гъахьну. Дагъустандин дирбаш баяри ихь аьхю Ватандиз читин йигъари думу бадали чпин жан фида апIуз гьязур вуйивал улупну. Дурари Ватандин улихь чпин буржи тамам гъапIну. Хъа гьамус ухьу жилиин дурарин гьюрмат уьбхюри имбударин улихь ихь буржи тамам дапIну ккунду. Учву намуслу, Ватандиз вафалу баяр тербияламиш гъапIунчва. Гъи ухьу кIваин апIурайидар – Дагъустандин ва Урусатдин дамагъ ву. Дурарихьна вуйи гьюрмат гьарган ихь юкIвариъ гъубзди».
Республикайин Главайи, гъийиху эскрарин хизанариз кюмек тувбан бадали, фонд тешкил апIбакан мялумат тувну. Думу фондназ республикайин бюджетдиан 50 миллион манат жара апIиди.
«Фонд ухьухъди дерд зигурайи, мумкинвал айи инсанарин кюмекниинди артмиш шлувалик умуд кивраза. Думу фонднаан гъийиху эскрарин гьарсаб хизандиз са-саб миллион манат жара апIиди», – гъапну Сергей Меликовди.
«Дявдин гъуллугънан буржи тамам апIури гъийиху ихь баяр гьарган кIваинди гъитдихьа. Хизанариз, абйир-бабариз, бицIидариз, багахьлуйириз артухъ фикир тувдихьа», – гъапну региондин кIулиъ айири.
Сергей Меликовдихъди вуйи гюрюшдиз Украинайиъ хусуси метлеб айи операция гъабхурайи вахтна чан гъуллугънан буржи тамам апIури гъакIи Табасаран райондин Цалак гъулан агьали Наврузбег Самурханович Самурхановдин адаш Самурхан Самурхановра дуфнайи. «Табасарандин нурар» газатдин редакцияйин журналистдихъди вуйи сюгьбатнаъ дугъу гьамци гъапнийи: «Дагъустан Республикайин кIулиъ айи Сергей Меликовди гизаф пашман серенжем кIули гъубхну. Гюрюшдиз уч духьнайидар вари Украинайиъ гъябгъюрайи хусуси метлеб айи операция-йиъ багахьлу касарихъ мягьрум духьнайидар вуйи. Республикайин Главайи гизаф гьюрматнан гафар гъапIнийи. Хажалатну юкIв убгурайи гьарсар касдин хил дибисну, башсагълугъвал мялум апIури, гъийиху эскрарин хизанар, абйир-бабар, веледар фикир тутрувди гъидритуз гаф тувнийи.
Йиз бай Наврузбегу дявдин гъуллугъназ гъягъруган чав туву гаф намуслувалиинди тамам гъапIну. Ватандира дугъан дирбаш’вал кIваълан гьадрапIур кIури, умуд кивурза».
Гьамусяаьт Украинайиъ кIули гъябгъюрайи хусуси метлеб айи операцияйиъ багахьлу касди, мирасди иштирак’вал дарапIрайи хизан Дагъустандиъ адаршул. Душваъ чпин буржи тамам апIурайидарра вари жигьил яшнан баяр-жилар ву. Шлубкьан ухди дявдин женгар ккудукIну, ихь жигьилар чпин хизанариз сагъ-саламатди хъадакну гъювализ ккилигурахьа.
