Гъубшу гьяфтайиъ Дагъустан Республикайин журналистар Мягьячгъалайиъ айи, С.Кь. Башларовдин ччвурнахъ хъайи медицинайин колледждиъ гъабхурайи ляхнихъди, душваъ туврайи образованиейихъди, студентариз аьгъювалар гъадагъуз яратмиш дапIнайи шартIарихъди таниш гъапIну.
Къайд апIуз ккундузуз, С.Башларовдин ччвурнахъ хъайи медицинайин колледждин филиалар республикайин Дербент, Избербаш, Каспийск, Буйнагъск, Хасавюрт ва Къизлар шагьрариъра а. Колледждин директор Руслан Мамаевди журналистариз туву мялуматаринди, зиихъ улупнайи шагьрариъ айи филиаларра кади, гъи колледждиъ, республикайианси, Урусатдин жюрбежюр регионариан ва багахь хьайи харажи уьлкйириан вуйи 5 агъзуртIан артухъ студентари медсестравалин, акушервалин, фельдшервалин ва силбарин техникдин цирклариан агъювалар гъадагъура.
«Жара йишвариан урхуз гъюрайи студентариз яшамиш хьуз общежитиера айич. Общежитиейиъ яшамиш хьуз саб вазлиз вуйи кьимат 5 агъзур манат ву. Гьадму кьиматнак гьар йигъан 3 ражари гьиврайи ипIрубдин кьиматра ка.
Мидланра гъайри, гьамусяаьт рес-публикайиъ айи колледжарин арайиъ ич колледж варитIан ужудар, гъийин деврин тIалабариз жаваб туврайи шартIарихъдира тямин дапIна.
Аьхиримжи йисарин арайиъ, дарсар кивруган студентар таниш апIбан бадали, медицинайин лазим вуйи шей’арихъ, пластмассайикан, гипсдикан дапIнайи жюрбежюр кIалбарин мутмйирихъ миллионариинди пулар харж дапIнача. Гьаци вуйивализ лигну, учухь урхурайи студентар, чпи кадабгънайи пишейи вари терефарихъди таниш духьну, учхьан гъягъюра», – гъапну колледждин директори.
«Сар ич студент, учухь урхури имиди экзаменар тувну, И.М. Сеченовдин ччвурнахъ хъайи Москвайин гьюкуматдин медицинайин университетдик урхуз кучIвну. Гьаци, ич колледж ккудубкIбалан кьяляхъ Дагъустандин гьюкуматдин медицинайин университетдик кучIвну, духтрар шулайидарра гизаф а. Яна гъи ич колледждин выпускникарихьан наан вушра ляхин апIуз шула, хъа заан образование гъадабгъуз ккунидари урхуб давам апIура. Хъа, С.Башларовдин ччвурнахъ хъайи колледждик урхуз кучIвбан бадали, ккуни айи асас документ анжагъ 9-пи класс вая 11-пи класс ккудубкIбакан мялум апIурайи аттестат ву», – гъапнийи сюгьбатчийи.
Колледждиъ фельдшервалин отделениейиъ урхурайи, Хив райондин УртIил гъул’ан вуйи Казбек Уьмаровди (шиклиъ) уч духьнайидар чан пишейиз лазим вуйи медицинайин алатарихъди таниш гъапIнийи, ва дурарихьди гьапIну ккундуш, улупнийи.
Казбек Уьмаровди «Табасарандин нурар» газатдиз туву мялуматариинди, гъулаъ мектеб ккудубкIбалан кьяляхъ, думу гьаму колледждик урхуз кучIвну ва мина гъювалиин швумал гъахьундар.
«Колледждиъ студентарихьна вуйи янашмиш’вал лап ужуб ву. Мушваъ низам-къайда уьбхюз, яна вахтниинди дарсариз гъювализ, палат алабхьбаз, дарсар ккададаувализ аьхю фикир тувра. Эгер студентдихьан зачет вая экзамен дишлади тувуз дархьиш, дугъаз, ужуди гьязур духьну хъанара шубуб ражарисан гъюз мумкинвал тувра. Узу ужуди дарсар урхураза. Колледж ккудубкIбалан кьяляхъ Дагъустандин гьюкуматдин медицинайин университетдиъ урхувал давам апIуз ккундузуз»,
– гъапнийи Казбекди.
Колледж урхбан бадали, студентари йисандин арайиъ 55 агъзур манат тувра. ЦIийи урхбан йисхъан мина кьимат 60 агъзур хьибди.
Колледж хусусиб вушара, душваъ урхуб ккудубкIган туврайи диплом гьюкуматдин чешнейинуб ву.
