5-пи апрелиъ Табасаран райондин культурайин хулаъ Челябинскдиан дуфнайи «Империаль» кIуру циркну саб сяаьтнан вахтна жюрбежюр аьламатар кайи программа улупну.

 

Циркдин программайиъ асас нумрар Пензайиан дуфнайи жилирна хпир Павел ва Юлия Евстратовари тамам гъапIнийи. ВаритIан аьламатнан нумрар Юлияйи Евстратовайи Чика кIуру тутугъушрахъди ва Киндир кIуру хуйихъди, хъа Павел Евстратовди маймнихъди улупнийи. Хъа гъямпI ва уинбаз Радик Гафиуллинди жюрбежюр маракьлу уйинариинди ва аьмлариинди бицIи тамашичйиррин гевюл ачухъ хьуз гъитнийи.

Цирк ккудубкIбалан кьяляхъ, бицIидари масу гъадагънайи билетарик дурарин ччвурар дикIуз гъитну, лотереяра тешкил гъапIнийи ва гъалибчйириз пулин пешкешар тувнийи.

Программа шадвалин серенжемдиз уч духьнайи бицIидариз лап кьабул гъабхьнийи ва дурари, гурлу гарччлар йивбиинди, хялар кьабул гъапIнийи. Аьхириъ бицIидари циркнан коллективдикан хъанара райондиз гъювал ккун гъапIнийи.

Радик Гафиуллинди узуз ктибтганси, «Империаль» коллектив уьлкейин хайлин шагьрариъ гастролйириз гъубшуб ву. Гьамусяаьт дурари дагъустандин агьалйириз чпин устадвал улупура.