Аьхиримжи вахтна Урусатдин вари регионариъ «Ватандин Игитарин вахта» кIуру ватанпервервалин проект кIули гъябгъюра.

 

Улихьна йигъари Дербент шагьрира, гьаму проектдиз бахш дапIну, ДДЮТ-дин аьхю хулаъ «Урусатдин ватанпервервалин ассоциация» тешкилатдин президент, генерал-полковник Владимир Шамановдин иштирак’валиинди тешкил дапIнайи серенжем гъабхьну. Дина, Дербент шагьрин глава Рустамбег Пирмягьямедов кIули ади, шагьрин администрацияйин гъуллугъчйириз ва бязи районариан Ватандин Аьхю дявдин кьяляхъ йисари совет халкьдин, гьюкмин вакилин гьюрматлу ччвур намуслуди гъюбхю, агьалйирин ва жигьиларин арайиъ мянфяаьтлу ляхин гъабхбак лайикьлу пай киву касариз теклиф дапIнайи.

Му серенжемдиъ ихь ватанагьли, Дербент шагьрин зегьметнан ветеранарин, ОМВД-йин ва ВВ-йин Советдин председатель, шагьрин ветеранарин тешкилатдин президидумдин член Эмирбег Агъагюловра иштирак гъахьну.

Эмирбег Хидирович Агъагюлов 1995-пи–2006-пи йисари Табасаран райондин РОВД-йин начальникди гъилихну. Хъа 2006-пи йислан мина думу хайлин вахтна Дербент шагьрин ГОВД-йин начальникдин кюмекчиди лихури гъахьну. Гьамусяаьт лайикьлу пенсияйиъ а.

Владимир Шамановди, Эмирбег Хидировичди гъизигу зегьметназ заан кьимат тувну, дугъаз чухсагъул мялум гъапIну ва ихь ватанагьли кьиматлу сяаьт тувбиинди лишанлу гъапIну.