Гъи вари дюн’яйин агьалйири гьаму суал туврашул гъапишра, кучIал даршул, гьаз гъапиш чвевалин кьюб уьлкейин арайиъ ипнайи дявдин гъалмагъали вари дюн’яйин агьалйириз тясир дапIна. Урусатдизна Украинайиз му аьхю бедбахтвал, дявдин гъуллугъчйир ва ислягь инсанар йивну йихувал дубхьнаш, имбудариз ригъ алабхъру терефнан уьлкйири Урусатдиз аьксиди кьабул гъапIу санкцйири экономикайин аьхю читинвалар ва яшайишдин гъайгъусузвалар арайиз духна.
РФ-дин ХатIасузвалин Советдин председателин заместитель Дмитрий Медведевдин гафариинди, хусуси метлеб айи операция ккудубкIбакан улхуз гьелелиг ухди ву. Урусат чан улихь диву вазифйир – Украина яракьсуз ва миллетчйирихьан азад апIувал, диди бейтереф статус кьабул дапIну, Донбассдин агьалйир йисариинди давам шули гъабхьи геноциддихьан азад апIувал, гъунши гьюкуматари Урусатдиз къаршу политика гъабхувал дебккувал – тамам дарапIкьан гагьди кьяляхъ хътабкбанди дар.
Дмитрий Медведевди туву мялуматариинди, мидиз улихьна Урусатди украинайин гьюкмихъди мясляаьтар апIуз чалишмиш’валар гъизигнийи, амма дурари натижа тувундайи. Мидланра савайи, Украина РФ-диин ва Крымдиин алархьуз гьязур шулади, думу гьяракатар 28-пи феврализ планламиш дапIнади гъахьну.
Гъи дявдин экспертари кIурайиси, дявдин хусуси метлеб айи операция дурубхди гъузуз шули гъабхьундар.
Улихьнаси РФ-дин Президент Владимир Путиндира къайд гъапIганси, США-йин ва НАТО-йин регьберваликкди Украинайи Урусатдиз жара чара гъибтундар. Урусат чан сяргьятар ядерный ва дявдинна биология-йин хатIалувалихьан уьрхюз мажбур гъабхьну.
– Украинайиъ урусатдин яракьлу кьувватарин хусуси метлеб айи операция саб вазна гьацIаъсана давам хьибди, — гъапну «Гьякьлу Урусат» партияйин сопредседеталь Захар Прилепинди. Ихь кьушмари Киев ва Харьков кьялаъ тIаъну, душвариз хурайи яракьдинна убгрубдин рякъ хъябкьди. Йихувалар гизаф дархьбан бадали, Киев бисувал ярхи хьубра мумкин ву.
1943-пи йисан Киев фашистарихьан азад апIруган, ихь 413 агъзур кас гъийихну. Му ражну Урусатдин улихь-кIулихь хьайидари дициб хьуз гъитидар», – къайд гъапIну З.Прилепинди.
Хъа дявдин анализ апIру Константин Сивковдин гафариинди, дявдин хусуси метлеб айи операция апрелин аьхирариъ ккудубкIубра мумкин ву.
РФ-дин Яракьлу Кьувватари миллетчйирихьан украинайин жилар сабдихъди саб азад ва чпин рякъюъ Украинайин дявдин техника дагъитмиш апIури, ригъ алабхъру терефнаъ айи Украинайин армияйизра йивбар апIура.
Миллетчйирин батальонари ва ВСУ-йи чпин яракьар ислягь инсанар яшамиш шулайи йишварихь ерлешмиш апIурайивали операция ярхи хьпаз тясир апIура. Дурари алчагъвалиинди дявдин гъуллугъчйир ва техника ислягь инсанар айи машинариъди хура. Дицдар шартIариъ ихь кьушмар операция лап ихтиятвалиинди гъабхуз мажбур шула.
ЦIийи жямяаьтлугъдин Институтдин ахтармишарин центрин кIулиъ айи Василий Колташовди къайд гъапIганси, хусуси метлебнан операция ккудубкIбалан кьяляхъ, Украина Урусатдин ва Беларуссдин блокдиз кьяляхъ хибди. Гьацира дидин кьяляхъ Евразияйиъра экономикайин гъурулуш ва думу артмиш хьпан рякъярра дигиш хьиди.
Ригъ алабхъру терефнан уьлкйирин Урусатдиз аькси пропаганда гъабхури адру экспертарира тасдикь апIурайиси, киевдин гьамусдин къайдайин аьхир шлубдин шак адар.
Гьелбетда, сагъу фикир айи фунур ватандашра жвуван уьлкейин гъалибвалиин рази дархьиди гъудрузур, амма дидихьна вуйи рякъ, гьяйифки, заан кьимат т1алаб ап1руб, ихь жилариз чпин уьмрилан хил алдабгъуз гъитруб ву…
