Дагъустандин зегьметнан министерствойин дахилнаъ айи, агьалйириз кюмек апIуру ва яшайишдин игьтияжар гьуркIру идарйирин вакилар Донбассдиан ва Украинайиан ихь республикайиз гьергну дуфнайидариз кюмек тувбан серенжемариъ жанлуди иштирак шула.
Гьаму йигъари узу Табасаран райондин яшайишдин ихтиярар уьрхру идарайин кIулиъ айи Элина Байрамовайихьна илтIикIунза ва Украинайиан, Донецкдин ва Луганскдин халкьдин республикйириан гьергну дуфнайи ихь ватандашариз фициб кюмек тувраш, мялуматар гъадагънийза.
«Гъийин йигъаз Табасаран райондиз Украинайин жюрбежюр шагьрариан ва Донбассдиан гьергну 15 кас дуфна. Дурарикан сарпир вуди учухьна Харьковдин областдиан гъафи, Гьесихъ гъул’ан вуйи Эскер Гьясратов илтIикIну. Учу дугъаз материалин кюмек вуди саб ражари пул ва яшамиш шулайи йишв’ан гьергуз мажбур гъахьивалин статус тувбан кагъзар гьязур апIуз хъюгънийча. Дугъаз банкдин картара абццуз ва ИНН адабгъуз кюмек гъапIунча. Амма РД-йиъ айи МЧС-дин вакилари гъапIу ахтармишари улупганси, Эскер Гьясратов Дагъустандиз цци 21-пи январиъ гъафну. Гьергну гъафидарин статус ва гьюкуматдихьан вуйи кюмек анжагъ 2022-пи йисан 18-пи февралихъан гъафидаризтIан тувуз ихтияр адар. Хъа му кас Урусатдиз Украинайиъ дявдин гьядисйир ккергъайиз дуфнайивализ лигну, думу кюмек рубкьрударин сиягьнак кахъундар. Гьамусяаьт Эскер Гьясратов Ростовдиъ а.
Тмуну 14 касдизра учу гьюкуматдин терефнаан кюмек вуди саб ражари тувру 10 агъзур манат ва гьергну гъафидарин статус тувбан кагъзар гьязур апIурача. Думу инсанар асас вуди Харьковдиан ва Мариуполиан ву. Гьамусяаьт дурар Хючна, СиртIич, Рушвул ва жара гъулариъ майил-мадатдихь хьа. Райондин КЦСОН-дин вакилари чпин харжарихъ думу инсанар итIру сурсатдихъди ва алабхьру палатдихъди тямин апIуз чпихьан шлу кюмек тувра. Центрин психологари дурарихъди сюгьбатар гъахура, ляхин апIуз ккунидар лихру йишварихъдира тямин апIиди. ИкибаштIан, медицинайин кюмекра дурариз пулсузди ву», – гъапну ич сюгьбатнаъ Элина Байрамовайи.
Дугъу къайд гъапIганси, хайлин йисари гъазанмиш гъапIу девлет, хал-йишв дипну, гьергну дуфнайи ихь ватандашари Урусатдин терефназ, ихь эскрарин жумартвализ баркаллагь кIурайи, хъа Украинайин кIулиъ айидари ва миллетчйирин дестйири аьхиримжи йисари чпи гъагъи гьялнахъна гъахиваликан ктибтурайи.
