Урусатдиъ жигьилариз яракьлу кьувватарин жергйириз дих апIру вахт улубкьна. Украинайиъ хусуси метлеб айи операция гъябгъюрайивалихъди аьлакьалу вуди, ухькан гьарсаринси, армияйиз дих дапIнайи жигьиларин абйир-бабарин юкIварикра гъалабулугъвал ка.
Апрелин 5-пи йигъан РД-йин военный комиссар Дайтбег Мустафаев республикайин журналистарихъди (шиклиъ) гюрюшмиш гъахьну, ва дугъу СМИ-йин вакиларин суалариз жавабар тувну.
Сифте чан улхбаъ военкомди гъубшу йисан чвлин призывдин натижйирикан мялуматар тувнийи. Дугъан гафариинди, чвлин призывдин вахтна республикайиан 3 агъзуртIан артухъ баяр армияйиз гъушнийи, дурарикан 2 агъзуриинакьан пишекарвалин гьязурлугвал айидар вуйи. Республикайиз улупнайи план вахтниинди тамам гъапIнийи.
2022-пи йисан хьадукран призывдин кампания апрелин 1-пи йигълан июлин 15-пи йигъазкьан давам хьибди.
«Гъубшу йисандин чвлин призывдихъди тевиган, вари уьлкейиъ яракьлу кьувватариз дих апIурайидарин кьадар цIиб гъабхьну, ва думу 134,5 агъзур призывник ву. Кьибла ва Кафари Кавказдин дявдин округари Дагъустандиан 3 агъзуриинакьан кас армияйиз гьаувалин план улупна. Гьарганси гьамусра, ихь жигьилари РФ-дин Яракьлу Кьувватарин, Росгвардияйин, МЧС-дин ва кьувватнан жара органарин жергйириъ гъуллугъ гъабхиди. Призывникарин дестйир гьеле гъуллугъназ гьаърадар, РФ-дин оборонайин министри мялум гъапIганси, сабпи дестйир 20-пи майдихъан армияйин жергйириз гьаъди», – къайд гъапIнийи Д.Мустафаевди.
Главайин табшуругъниинди РД-йин призывдин комиссйир ва муниципальный органарин призывдин комиссйир тяйин дапIна. Аьлава вуди думу комиссйирин дахилназ жямяаьтлугъ тешкилатарин вакиларра кьабул дапIна. Диди призывдин ачухъ’вал субут апIура.
Призыв медицинайин тIалабариз асас вуди гъабхура. Гьарсар жигьилин коронавирусдин инфекция кайивал-ктрувал ахтармиш апIура, дурар сарикан тмунурикна тарагъру уьзрарихьан уьрхру алатарихъди тямин апIура.
«Къайд апIуз ккундузуз, чпин веледдин гъаразнаъ айи абйир-бабарин кIваз рягьят апIураза, сар призывникра Украинайин аьтрафариин гъябгъюрайи хусуси метлебнан операцияйиъ иштирак хьуз гьаидар. Запасдиъ айи ватандашарра Украинайиз гьаърадар. Уьлкейин боронайин министри ва КIулин командующийди лазим вуйи указар адагъна», – гъапну Д.Мустафаевди.
Республикайин военкомдин гафариинди, республикайин военный комиссариатариъ Украинайиъ гъябгъюрайи хусуси метлеб айи операцияйиъ жвуван хушниинди иштирак хьуз ккунидарин дестйир уч апIура. Думу дестйириз анжагъ военный гъуллугънан тажруба айи касартIан кьабул апIурадар.
Учу хьадукран призыв Табасаран ва Хив районариъ фици кIули гъябгъюраш аьгъю апIбан бадали, тялукь военкоматариз илтIикIнийча.
Хив ва Агъул районарин военкоматдин кIулиъ айи Пирмягьямед Къубачевди учуз туву мялуматариинди, гьаму призывдиз кьюбиб районариан 50-рихьна жигьилариз призывдиз дих апIиди. Хъа Табасаран райондиан Урусатдин Яракьлу Кьувватарин жергйириз гьаму призывдиъ 60 жигьил гъахиди.
Ихь вари жигьилариз, чпин буржи тамам дапIну, сагъ-саламатди кьяляхъ гъювал кьисмат ибшри.
