Гъябгъюрайи йисан 31-пи мартдиъ, бажаранвал кайи бицIидар ашкар апIбан ва дурариз кюмек тувбан, дурарин удукьувалар артмиш апIбан бадали ва Дагъустан Республикайиъ бабан чIалар уьрхбан ва гьацира гележегдиъ артмиш апIбан метлеб ади, милли чIаларианна литературйириан ва «Дагъустандин тарих» предметдиан тешкил дапIнайи олимпиада кIули гъубшну.

 

 

Олимпиада сифте мектебдин, хъасин муниципальный ва республикайин этапариъди кIули гъубхнийи. Мектебдинна муниципальный этапарин тешкилатчйир шагьрарин ва районарин образованиейин управленйир ва отделар, хъа республикайин этапдин – Дагъустан Республикайин образованиейинна илимдин министерство ва Дагъустандин образованиейин артмиш’валин институт вуйи.

 

Бабан чIалнаанна литературайиан олимпиадайин республикайин этапдиъ авар, дарги, къумугъ, лезги, лак, табасаран, азербайжан ва чечен чIаларин секцйири ляхин кIули гъубхнийи.

Муниципальный этапдиъ ва улихьна йисан республикайин этапдиъ гъалиб гъахьи баяр-шубарин арайиъ кIули гъубшу олимпидайиъ табасаран чIалнаан Дербент шагьрин 18-пи нумрайин «Вари дюн’яйин культурайин гимназия» 10-пи классдиъ урхурайи Аьйшат Гьясановайи сабпи йишв гъадабгъну. Думу олимпидайихьна гьязур гъапIур гимназияйиъ табасаран чIалнаан ва литературайиан дарсар кивайи мялим Сарида Самедова ву.

Дупну ккундуки, Аьйшатдин му сабпи гъалибвал дар. Урхбахъ юкIв хъайи ва дидихьна заан жавабдарвалиинди янашмиш шулайи табасаран шуру мидиз улихьнара жюрбежюр предметариан вуйи конкурсариъ, олимпиадйириъ ва жара талитариъ хъуркьувалар гъазанмиш дапIна.

Гьаци, «Хъуркьувалихьна вуйи сабпи гамар» кIуру, уьмуми образованиейин тешкилатариъ урхурайидарин арайиъ вуйи вари Урусатдин илимдинна тажрубайин 1-пи конференцияйиъ «Дербент шагьрин атмосферайин биоиндикация» яна шагьрин гьавайиз, дидиъ яшамиш шулайи чIивишнарин гьялназ лигну, кьимат тувувализ бахш дапIнайи илимдинна ахтармиш’валин ляхин хьади иштирак духьну, дугъу 2-пи йишв гъадабгъну, «Илимди живанар тухъ апIура» ччвур тувнайи ахтармиш’валин ляхнарин ва проектарин республикайин конкурсдиъ «Тарих ва жямяаьтлугъдикан аьгъювалар гъадагъувал» цирклиан финализ удучIвну, биологияйиан республикайин олимпиадайиъ ва «Аьхю дих апIбар» кIуру илимдинна технологияйин проектарин вари Урусатдин конкурсдин региондин этапдиъ пешкешнан йишварин сагьиб гъахьну. «Уьбхюрхьа багъри табиаьт» кIуру вари урусатдин конкурсдин муниципальный этапдиъ Аьйшатди 1-пи йишв гъадабгъну ва хъана хайлин жара муниципальный конкурсариъ хъуркьувалар гъазанмиш гъапIну.

Аьгъювалар гъадагъбахъ юкIв хъайи ва аьхю зигьим айи ихь шураз гележегдиъра, умудлувалиинди ликар алдагъури, хъана заан хъуркьувалар гъазанмиш апIуб ккун апIурхьа ва дугъан мялимаризна абйир-бабариз аферин кIурхьа.