Чпин баркаллу зегьметниинди, ужудар ляхнариинди, халкьдин мяишатдиз мянфяаьт кайи ужудар веледар тербияламиш апIбиинди гьюрмат гъазанмиш гъапIу касарикан «Табасарандин нурар» газатдин машариъ кми-кмиди макьалйир чап апIувал аьдат дубхьна. Гьацдар гьюрматлу касарикан сар – зегьметнан ветеран, урчIвур веледдин баб, гъулан мяишатдин циркил артмиш апIувалик лайикьлу пай киву Султанат Аьлибеговара ву.
Султанат Ярягьмедовна Аьлибе-гова 1942-пи йисан 10-пи апрелиъ Табасаран райондин Ружвникк гъулаъ гизаф бицIидар айи нежбрин хизандиъ бабкан гъахьну. Ватандин Аьхю дявдин йисари бабкан гъахьи бицIидарин уьмур фукьан вушра читинуб гъабхьну. Думу вахтнан бицIидар, лап бицIи вахтнахъан мина абайизна бабаз кюмек апIури, зегьмет зигбиин юкIв алди вердиш апIуйи. Мектебдиъ урхурайи бицIидар чпин мялимарихъди хутIлиъ экин убгбан кьяляхъ гъузу дяхнин кIулар уч апIуз хъади гъягъюри гъахьну. Султанат Аьлибеговайира чан вари уьмур хулан, гъулан мяишатдин ляхнар апIури адапIну. Чан яш 18 йис гъабхьиган, дугъу чан зегьметнан рякъ Табасаран райондин «Рубас» совхоздиъ лихури ккебгъну.
«Ватандин Аьхю дявдин кьяляхъ йисари дявди ккидипнайи уьлкейин экономика, гъулан мяишат за апIувалик думугандин жигьиларин лайикьлу пай ка. Партияйи гьарсаб совхоздин, колхоздин улихь 5 йисандин планар дивуйи, хъа гьадму планар улупнайи вахтназ улихьна тамам апIури, социалист соревнованйир – зегьметнан талитар тешкил апIуйи. Советарин девриъ Табасаран райондин совхозариъ багъманчивал, тIумутIчивал, малдарвал ужуди артмиш дапIнайи. Узу набататчивалин звенойин кIулиъ айир вуди шуйза. Йиз десте апIурайи ляхниан гьарган улхьан жергйириъ дубхьну ккундийзуз. Дестйирин арайиъ гьаммишан талитар тешкил апIуйча. Аьшкьлуди ляхниз гъягъюйча», – кIура Султанат Аьлибеговайи.
Му дишагьлийин зегьметнан рякъюн хъуркьуваларикан гизаф ихтилатар апIуз шулу. 1960-1970-пи йисари Султанат швнуб-саб ражари гъулан ва райондин советарин депутатдира ктагънийи. Дугъаз Советарин вахтнан гьюрматнан грамотйир а, премйир туври гъахьну.
Ляхниъ фукьан хъуркьувалар гъадагъишра, дишагьлийин варитIан аьхю девлет – жвуван хизан ву. Чан 19 йис тамам гъабхьиган, Султанат чпин гъулан мялим Демирбег Аьлибеговдихъди эвленмиш гъахьну, ва жигьилари бахтлу хизандин уьмур ккебгъну. Демирбег Аьлибегов 50 йисан мектебдиъ гъилихну. Дугъу аьгъювалар ва тербия туву баяр-шубарин кьадар аьхюб ву. Султанат халайи чан жилирихъди сабси 9 велед тербияламиш гъапIну. Гьамусяаьт дурар уьлкейин мяишатарин жюрбежюр цирклариъ лихура. Султанат халайиз дадавалин машгьурвалин медалар ва жара наградйир а, думу зегьметнан ветеранра ву.
«Улихь вахтари Табасарандиъ гизаф бицIидар айи хизанар шуйи. Веледарра албагдар, зегьметниин юкIв алидар вуйи. Гьамусдин девриъ, рягьятвалар гизаф ашра, хизандиъ кьюр-шубур веледтIан шулдар. Гьелбетда, гизаф веледар тербияламиш дапIну арайиз адагъувал – рягьят ляхин дар. Хъа читинваларин натижа ужуб шулу. Аьхю хизан – аьхю девлет ву. Вари сатIиди уч гъахьиган, дурарин терефнаан гьюрматнан гафар ерхьруган, кIваз гизаф рягьят шулу», – къайд апIура Султанат Ярягьмедовнайи.
Апрелин 10-пи йигъан Султанат Аьлибеговайи чан 80 йисандин юбилей къайд гъапIну. Гъи думу, лайикьлу рягьятвал гъадабгъури, чан худларин, гудларин хъуркьувалариз разиди лигури дусна. Хъа худлар дугъуз 22, гудларсана – 14 а.
«Табасарандин нурар» газатдин редакцияйин коллективдин терефнаан Султанат хала чан юбилейихъди тебрик апIури, дугъаз жандин мюгькам сагъ’вал, ярхи ва бахтлу уьмур ккун апIурача.
