Гъубшу гьяфтайиъ Ахцигь райондиъ ва Мягьячгъала шагьриъ музыкайин ва бицIидарин искусствйирин мектебарин арайиъ конкурсар кIули гъушну. Дурариъ Табасаран райондин Кьасум Мягьямедовдин ччвурнахъ хъайи искусствйирин мектебра иштирак гъабхьну.

 

 

Ахцигь район-дин Хрюг гъулаъ республикайин ра-йонарин арайиъ Урусатдин халкьдин артист Рягьимат Гьяжиевайин ччвур тувнайи жигьил пианистарин конкурс кIули гъубшнийи. Табасаран райондиан вуйи Залина ва Рашид Рустамовар (шиклиъ) думу конкурсдиъ сабпи ражари иштирак гъахьну. Конкурсдин 40 иштиракчийин арайиъ Залина Рустамовайи шубубпи йишв гъадабгъну. Жюрийин председатель Хан Башировди Залина шубубпи дережайин дипломдиинди ва кубокдиинди, хъа дугъан мялим Исмяил Исмяиловра гьюрматнан кагъаз ва багьалу пешкеш тувбиинди лишанлу гъапIну. Рашид Рустамовра конкурсдин дипломдин сагьиб гъахьну.

Му конкурсдин кьяляхъ Мягьячгъала шагьриъра бицIидарин музыкайин мектебариъ ва бицIидарин искусствйирин мектебариъ урхурайидарин арайиъ халкьдин мукьмар йивбаан респуб-ликайин конкурс кIули гъубшну. Каманчи йивбан номинацияйиъ Рашид Рашидовдин хиликк урхурайи ихь ватанагьлийир Хадижа Мукаиловайи – кьюбпи йишв, Бесханум Аслановайи – шубубпи йишв гъазанмиш гъапIну. Гьацира ансамбларин арайиъ Табасаран райондин искусствйирин мектебдин «Дуствал» кIуру ансамблира шубубпи йишв гъибисну. Ансамблин дахилнаъди конкурсдиъ 11 касди иштирак’вал гъапIну: А. Гьяжиевайи, А. Исаевайи, М. Гьяжикеримовайи, Б. Аслановайи, Х. Мукаиловайи, А. Селимовайи, И. Султановди, Н. Дадашевди, А. Аслановди, А. Къазиагьмедовди ва А. Къурбановди. Ансамблин художественный руководителра Рашид Рашидов ву.