Улихьна йигъари вари Урусатдин «2022-пи йисандин варитIан ужур мялим» конкурсдин республикайин этап аьхирихъна гъафну. Конкурсдиъ муниципальный этапариъ гъалиб гъахьи 55 мялим иштирак гъахьнийи. Дурарикан 17 мялим конкурсдин лауреатарси гьисаб гъапIну. Гьаму варитIан ужударстар 17 мялимдин арайиъ Табасаран райондин СертIил гъулан мектебдиъ инглис чIалнаан дарсар киврайи мялим Рамазан Рамазановра (шиклиъ) а. Конкурсдин кьяляхъ узу Рамазан Рамазановдихъди сюгьбат гъубхнийза.
Рамазан Гьарихъ гъул’ан ву. Гьарихъ ва СертIил гъулариз сатIиди вуйи саб кьялан мектеб а. Гьеле мектебдиъ урхури имиди гьам райондин, гьам республикайин олимпиадйириъ иштирак шули, дугъу учв кIубанди улупури гъахьну. 2012-пи йисан мектеб ккудубкIну, думу Мягьячгъалайиъ ДГПУ-йин Дагъустан чIаларин факультетдик урхуз кучIвру. Амма сад йисна гьацI гъубшган, думу инглис чIалнан отделение айи филологияйин факультетдиз гъягъюру.
«Узуз, дишди гъапиш, гьеле мектебдиъ имиди харижи чIаларин факультетдик урхуз кучIвуз ккундийзуз. Хъа мектебдиъ имиди учуз харижи чIалар кивру мялимар адайчуз. Узу 11-пи классдиъ урхурайиган, инглис чIал кивру мялим ФатIимат Сейидмягьямадова гъафнийи. Амма, сад йисан гъурхну кIури, ЕГЭ тувуз шулдайи. Гьаддиз узу, сифте жара факультетдик урхуз кучIвну, хъасин гьадушв’ан инглис чIалнан отделениейиз душну, пише гъадабгъунза. БицIи вахтнан арайиъ узу аьгъювалар гъадабгъбаан улихь хьайи студентарин цIарнаъ учIвнийза. 2018-пи йисан университет ккудубкIну, ич гъулаъ мялимди лихуз гъафунза», – ктибтура Рамазан Гьяжиевичди.
Рамазнан Ляхниъ дийигъну бицIи вахттIан даршра, думу муниципальный дережайин конкурсдиъ гъалиб духьну, республикайин варитIан ужудар мялимарин сиягьназра гъадагъну.
«Райондиъ конкурсдиз улихьна вуйи семинариз 22 кас гъафнийи. Амма хъайигъан конкурсдиъ 16 кастIан иштирак гъахьундайи. Му йигъан конкурсдин ляхниъ жвуван методикайин тажрубайикан кидибтну ккундийи. Гьаму 16 мялимдикан жюрийи 5 кас гъядягъну, ва учу гьарури конкурсдин дарс кивну ккундийи. Дишди кIурза, конкурсдиз иштирак хьуз гъушнушра, узу улихь гъягъюр кIури, фикир дайиз. Жюрийи асас вуди мялимарин хъуркьувалариз, дурарин ученикарин аьгъюваларин дережайиз, грамотйир айивализ ва ЕГЭ-йин баллариз фикир туврашул, кIурайза. Хъа жюрийи му терефар затра фикриз гъадагъундар. Йиз фикриан, дурар дюзра ву. Гьаз гъапиш, вари мектебарин техникайихъди, лазим вуйи алатарихъди, материалихъди вуйи тяминвал сабсиб дар. Фукьан ужур мялим вушра, эгер шартIар адарш, ученикариз бегьемди аьгъювалар тувуз гъагъиди шулу. Жюрийи ужуди урус чIал ва компьютер аьгъювализ, ученикарихъди гаф-чIал апIуз аьгъювализ, пишекарвалин тажрубайиз асас фикир туврайи. Райондин этапдиъра узу мюгьтал хьуз гъитуб гьадму вуйики, жюрийи асас вуди жигьилариз рякъ ачухъ апIурайи.
Улуз гъулан мектебдин ккергъбан классарин мялим Ражаб Шихмягьямадовдин ва ЧвулатI гъулан мектебдиъ инглис чIал кивру мялим Балабег Асланбеговдин дарсар кивбан къайда ва конкурсдихьна гьязур духьнайивал лап кьабул гъабхьунзуз. Хъа республикайин дережайиъ мастер-классар вари мялимари ужуди кIули гъурхнийи. Конкурсдин варитIан ужударстар хьур мялимдин арайиъ гъахьи, Гъяякент райондиан вуйи химияйин дарсар кивру мялим ФатIима Мягьямедова чав, саб жюрейинра методикайин кюмек дарди, ялгъузди гьязур духьну дуфнайи. Дугъан дарс вари мялимариз ужуб тажруба ву.
«ВаритIан ужур мялим» конкурсдиъ гележегдиъра иштирак хьуз ккундузуз, хъа гьелелиг хайлин ляхин дапIну ккунду. Гьаму конкурсдин варитIан аьхю хайир гьаддиъ аки, жвуваз хабар дару вари гъалатIар ачмиш шулу. Мялимдиз учв фтиин дилихну ккундуш аьгъю шулу. Узу хайлин йисари дилихну, ккунивалин бажаранлу мялимарихъан тажруба гъадабгъну ккунивалин гъавриъ гъахьунза. ИкибаштIан, конкурсдиъ иштирак шулайи 55 мялимдин арайиъ, пешкешнан йишвар гъадагъдари учу дарапIуб фу гъапIну, фу улупну, кIурударра, наразиди улхрударра айи. Хъа деъну, дурарин дарсназ дериндиан гъилигиган, дурарин аьгъювалар, тажруба, устадвалин цIийи къайда рябкъюру», – къайд апIура Рамазан Рамазановди.
Рамазнахъди сюгьбатнаъ учу СертIил гъулан мектебдин бицIидари ЕГЭ тувбан месэлайиканра гъулхнийча.
ВуйиштIан, дугъу 2-пи классдиан 11-пи классдиз дарсар кивра. Амма, СертIил гъулан мектебдиъ инглис чIал кивуз хъюгъну, гьелелиг 4-пи йистIан дар. Гьаддиз гъийин йигъан ЕГЭ тувуз баяр-шубар гьязурди адар. 11-пи классдиъ урхурайидари гьамусяаьт инглис чIалнаан аьгъювалар 9-пи классариз вуйи китабдиан гъадагъура. Рази апIурайиб саб ву – дурариз варитIан ужур мялимди дарсар кивра. Гьаддиз инглис чIалнаанра ужудар аьгъювалар айи табасаранар хъана артухъ хьиди.
Рамазан, яв кIваъ айи хиялар тамам ишри!
