Гъубшу йисан Рамазандин вазлиъ, коронавирусдин тIягъюн абхъну, инсанариз сар-сарихьна гъягъюз, уч духьну, сатIиди ушв гьибтуз мумкинвалра гъабхьундайи. Гьаддиз гьаму йисан саки вари шагьрариъ ва районариъ ушв гьибтбаз бахш дапIнайи мажлисар (ифтарар) кIули гъахура. 15-пи апрелиъ гьациб баркаллу мярака Табасаран райондин «Ургур чвуччвунна сар чуччун» гъалайиинра кIули гъубшну.
Вари райондин мажлис – ифтар Табасаран райондин глава Мягьямед Къурбановдин теклифниинди тешкил гъапIуб вуйи. Серенжемдиъ иштирак хьпан бадали, имамар, гъуларин советарин главйир, идарйирин пишекрар, гъуларин мяишатарин улихь хьайидар, саб гафниинди, 1000-рихьна инсанар уч гъахьнийи. Мажлис кIули гъабхуз райондин админист-рацияйин гъуллугъчйири ва волонтерари аьхю кюмек гъапIнийи.
Уч духьнайидарихьин- ди илтIикIну, Мягьямед Къурбановди му мажлис Рамазандин вазлиз, хъа гьацира Украинайиъ гъягъюрайи гьядисйириъ, чпин гъуллугънан буржи тамам апIури, жанар диврайи ихь эскрариз бахш дапIнайиб вуйиваликан гъапну.
«Гъи ухьу гьаму мажлис гъабхурайи йишв райондин гирами йишварикан саб ву, гьаддиз гьамциб яркьу серенжем кIули гъабхбан бадали, учу Ургур чвуччвунна сар чу-ччун гъала ктабгъунча.
Узу учву гьамциб мажлисдиъ рякъбиин рази вуза. Ислам – вари дюн’яйин дин ву, гьамцдар сатIиди вуйи серенжемари динагьлийирин аьлакьйир ижми апIуру ва ихь диндин ужувлан аьдатар уьрхюз кюмек тувру. Му гирами вазли гьарсар кас ужувлан ляхнар ва багахьлуйириз кюмек апIуз чалишмиш шулу. Гъит ихь юкIвар уж’валну ва сар-сарихьна вуйи гьюрматну ацIри, гъит учву гъидису ушвар ва гъапIу ужудар ляхнар Аллагьди кьабул апIри», – гъапнийи дугъу.
Уч духьнайидарихьна ва серенжемдин тешкилатчйирихьна илтIикIну, Табасаран райондин Жямяаьтлугъ пала-тайин председатель Аьли-мирза Гьясановди сатIиди ушв гьибтувал ужуб аьдатра, ниятра вуйиваликан, диди динагьлийир сатIи апIурайиваликан, хъа Рамазандин ваз гьюрмат ва уж’валар апIру ваз вуйиваликан, гиран кайидари, сар-сарихъди албагну, мясляаьтар дапIну ккуниваликан гъапнийи.
Мавлид кIули гъабхурайи Табасаран райондин администрацияйин АТК-йин ва диндин ляхнариз лигру пишекар Надир Зульфикьаровди, Табасаран райондин имамарин советдин председатель Ансар Рамазановди, Цалак гъулан имам ТIагьир Аскеровди, уч духьнайидарихьна илтIикIну, гъийин девриъ учIруди дийигънайи месэлрйикан вяаьз жюрейиинди ктибтнийи.
Мажлисдиъ гьацира нашидар, назмар гъурхнийи. Серенжемдин аьхириъ вари уч духьнайидари сатIиди гъудган дапIну, ушв гьибтнийи ва Аллагьу Тяаьлайикан мусурмнарин арайиъ сабвал хьувал ккун гъапIнийи.
