Апрелин 27-пи йигъан Ватанперверарин Ассоциация (АсПатриоты) кIуру жямяаьтлугъ тешкилатди магьан сарун 3-пи ражари вуди «БицIидариз разивал багъиш апIин – бицIидар жарадиндар шлуб дар» (Подари радость детям – чужих детей не бывает) акция кIули гъубхну. Акция, асас вуди, абйир-бабар адру ва касиб хизанариан вуйи бицIидариз кIури тешкил дапIнайиб ву.

 

Му серенжем республикайин дережайиъди гъабхьиб ву. Душваъ ихь районарианра бицIидар иштирак гъахьну. Табасаран райондиан саки 50-рихьнакьан, хъа Хив райондиан 15 бицIири иштираквал гъапIну.

«Хив райондин жигьилар» жямяаьтлугъ тешкилатдин председатель Мустафа Сеферовдин, гафариинди му, 3-пи ражари вуди тешкил гъапIу акция, Мягьячгъала шагьрин глава Салман Дадаевдин жягьтлувалиинди кIули гъубшну.

«Хив райондиан Мягьячгъалайин «Дракон» паркдизкьан бицIидар хуз машинарихъди райондин образованиейин управлениейи тямин гъапIну. Меркездиз бицIидарина гюзчивал апIури РД-йин зегьметнанна яшайишдин артмиш’валин Министерствойиз дахил шулайи Хив райондиъ айи яшайишдин жигьатнаан гъуллугъар гьуркIрайи отделин пишекрарра гъафнийи. Мягьячгъалайиз хъади гъафи бицIидар ипIрубдихъди тямин апIуз чпин ччвурар ачухъ дарапIуб ккун дапIну, ихь мяргьяматлу юкIвар айи ватанагьлийири кюмек тувнийи»,

– къайд гъапIну Мустафа Сеферовди.

Ав, му жюрейин серенжемар гъахуб, ужудар ляхнарикан гьисаб шула. Хъади-хъади шубубпи йисан вари республикайин йитимар ва касиб хизанариан вуйи бицIидар уч дапIну, «Дракон» паркдин жюрбежюр аттракционариъ чIанади яртуз гъитрайи паркдин руководствойизра аьхю чухсагъул. БицIириз, асас вуди йитимар ва касибариз гъапIу уж’вал, дугъан гьаргандиз кIваинди гъубзру. Хъа абйир-бабар адру, ва касиб бицIидарин кьадар ихь арайиан кам ибшри.