Игитар кIваълан гьархидархьа!
Гъийин ачухъ зав, ихь Ватандин азадвал, асиллу дарувал бадали 20 миллионтIан артухъ совет инсанари чпин жанар фида гъапIну. Ватандин Аьхю дявдиъ гъазанмиш гъапIу Аьхю Гъалибвалик пай киву игитарин рякъ гъийин деврин жигьилари давам апIура. Украинайиъ Урусатдин Яракьлу кьувватарин хусуси метлеб айи дявдин операция ккебгъну, кьюб вазтIан артухъра ву. Гьаму муддатнаъ, жвуван Ватан ва халкьдин ислягьвал бадали чпин жанар гьяйиф дарапIди, фукьан жигьил эскрар уьмриан гъушну. Му пис гьядисйирин кьутIкьли дад саб хизандинра гъвалхъантина гъубшундар, думу варидарик кубкIра. Ихь газатдин машариъра гьамусяаьт нацистарихъди вуйи гъагъи женгариъ иштирак шулайи ва гьацира багъри ватан ва ихь уьлкейин аку гележег бадали чпин жанар гьяйиф дарапIу игит баярикан бикIуз кIваълан гьапIрадарча. Икрам апIидихьа чIивидаризра, икрам апIидихьа гъийихдаризра.
Дявдин хусуси метлеб айи операция ккебгъу садпи йигъариланмина, Ватандин ва халкьдин ислягьвал уьрхюри, чпин жанар фида гъапIу игитарин пашман цIарнаъ ихь ватанагьли Райдин Аьшурбегович Сеферов а. Дугъан вари багахьлуйир Дагъ. Огни шагьриъ дуланмиш шула.
Ватан бадали жвуван жан диву жигьил эскер Райдин Сеферовдин абайизна бабаз ва мирасариз дерин башсагълугъвал мялум апIури, дурарихъди гюрюшмиш гъахьунза.
Райдиндин уьмрин жилгъа фициб гъабхьнуш, узуз дугъан аьхюну эм Сефер Сеферовди ктибтнийи.
«Райдин 1994-пи йисан Хив райондин ХурсатIил гъулаъ бабкан гъахьну. Дугъан абйир-бабар Каспийск шагьриъ дуланмиш шулайидар вуйи, амма Райдин аьхю абайихъди ва бабахъди ХурсатIил гъулаъ аьхю гъахьир вуйич. Шамил абайи думу чан худул гьеле бицIидимиди ватанпервервалин гьиссар ади, аьхюр-бицIир аьгъяди тербияламиш гъапIнийи. Мектеб ккудубкIбалан кьяляхъ, Райдин Каспийск шагьриз чан абйир-бабарихьна гъушнийи. СацIиб вахтналан дугъаз военкоматдиан повестка гъафнийи, ва Райдин чан ватандаш’валин буржи тамам апIуз армияйиз гъушнийи. Гъуллугънан вахт аьхирихъна гъюри, Райдинди абйир-бабариз чан гъуллугъ контрактдин къайдайиинди давам апIуз ккунди айиваликан хабар дебккру. Гьелбетда, балин кьастарин гъавриъ айи абйир-бабарира дугъаз къаршувал улупундар. Хъа дугъан адаш Аьшурбегу, Райдиндикан кьяляхъ гъюб ккун дапIну, дугъаз Каспийск шагьриъ ерлешмиш духьнайи дявдинна гьюлин пияда кьушмарин десантчиди гъуллугъ апIуз теклиф апIуру. Гьамци Райдин чан ватандаш’валин буржи тамам дапIну кьяляхъ гъафир, дишла ляхниъ дийигъуру.
Йиз чвуччвун бай ву дупну, кIурадаза, амма гизаф дирбаш, гьарсаб апIурайи ляхнихьна гьевес айир вуйи. Байвахтнахъанмина ляхнихъ юкIв хъади вердиш гъахьи Райдинди гъуллугънаъра чав анжагъ ужуб терефнахъанди улупну, чаз алахьу читинваларин улихь кIул ис гъапIундар.
Дугъахъди гъуллугъ апIури гъахьи эскрари Райдин йивну йикIбакан гьамци ктибтурайи: «16-пи мартдиъ гвачIнинган, Украинайиъ Уьру кIапIал кIуру йишвхьан цIибди ярхласи кIули гъябгъюрайи гъати женгнаъ ич командир йивну гъакIнийи. Му ляхникан хабар гъабхьи Райдинди, пис хъял кубчIвну, учу багахьна гъюз гъидритди, пулеметдиан гюлле уьлюбхну, хулаъ жин духьнайи вари душмнар гъирмиш апIуру. Хъа учв сарун гьадушв’ан удучIвуз гьяракат апIурайи вахтна, жара терефнахъан йивурайи гюллейин улихь гьахъру».
