Игитар кIваълан гьархидархьа!
Февралин вазлихъан мина Урусатдин Яракьлу кьувватари Украинайиъ хусуси метлеб айи операция гъабхура. Дидин асас вазифа – 8 йисандин арайиъ аьрвалар хури гъахьи Луганскдин ва Донецкдин автономный республикйир Украинайин нацистарихьан азад апIувал ву. Му операцияйиз швнуд-сад агъзрариинди ихь ватандин эскрар гъушну. Душваъ зийнар гъахьидарин, Ватан бадали чпин жанар тувдарин кьадарра, гьяйифки, цIиб дар. Сарпидарди кубкIну, гъахьи аьхю зийнариан гъийихдарин арайиъ ихь ватанагьли Наврузбег Самурхановра а. Дугъан уьмрикан вуйи жикъи ихтилат исихъ чап апIурача.
Наврузбег Самурханов 1982-пи йисан Табасаран райондин Цалак гъулаъ Самурхан халуйинна Умижат халайин хизандиъ бабкан гъахьну. Байвахтнахъанмина дугъан кIваъ Ватан уьбхбан гъуллугъ гъабхуз мурад-метлеб айи. Гьаци вуйиган, думу чан уьмур гьадму рякъюъди давам апIуз мажбур гъахьну.
Хючна гъулан 1-пи нумрайин кьялан мектеб ккудубкIбалан кьяляхъ, 1999-2001-пи йисари Наврузбег Самурханов РФ-дин армияйиъ гъуллугъ апIуз гъюгъюру. Армияйиан гъафи жигьили, 2004-пи йисан НичIрас гъулан Нейбуллагь ва Сусан Сефербеговарин риш Маринатдихъди чан хизанра ккебгъру. Эвленмиш духьну 3 вазлилан, чан бицIидигандин кIван мураднахъ хъуркьбан бадали, думу Наро-Фоминск шагьриъ прапорщиквалин курсар урхуз гъягъюру. Йирхьуб вазлин арайиъ урхуб ккудубкIган, гьадушв’ан думу контрактдиинди РФ-дин Яракьлу кьувватарин Урусатдин оборонайин министерствойин дахилнаъ айи Буйнагъск шагьрин 63354 нумрайин пияда кьушмарин частназ гьаъру. Гьаддихъанмина думу чан хизанра хъади Буйнагъск шагьриъ яшамишра гъахьну.
Гъуллугъ давам апIури, цIиб вахтналан Наврузбег Самурханов частнан айитI айи радиосвяздин начальникди дерккру. Наврузбег Самурхановичди хайлин йисари думу ляхин апIури гъахьну, хъа сач декабрин вазлиъ думу радиоаппаратныйдин начальникди дерккнийи.
Дирбаш эскриси гъуллугъ давам апIури, ихь ватанагьли 2008-пи йисан Осетияйиъ кIули гъушу женгариъра намуслувалиинди иштирак гъахьну. Думу кми-кмиди жара регионариз вердиш апIбан серенжемаризра гъягъюри шуйи. Сачра Крымдиъ вердиш апIбан серенжемариъ ади гъахьну, хъа цци 4-пи февралиъ дурар нубатнан ражари Крымдиз гьаънийи. 24-пи февралиъ дурарин батальон Урусатди Украинайиъ гъабхурайи хусуси метлебнан операцияйиз гьапIру. Дина гьаъбан кьяляхъ, шубуд йигълан Бердянск шагьриъ гъубшу дявдин женгнаъ Наврузбегаз гъагъи зийнар гъахьну. Вахтниинди кюмек апIуз хътруркьувалиан, жандиан гизаф ифи удубзну, 39 йисан яшариъ айи Наврузбег Самурханов гьадушв’ин кечмиш шулу. Урусатди Украинайиъ гъабхурайи хусуси метлеб айи дявдин операцияйиъ дирбаш’вал ва игитвал улупу, Ватан бадали гьяйиф дарапIди жвуван уьмур туву Наврузбег Самурханов, Урусатдин Президент В.В.Путинди 2022-пи йисан 17-пи мартдиъ адабгъу 123-пи нумрайин Указадиз асас вуди, Кьягьялвалин орден тувбиинди лишанлу гъапIну.
Наврузбег Самурханов хизандин фицир эйси, баяриз фицир адаш, уьмрин фицир юлдаш вуйиш, «Табасарандин нурар» газатдиз Маринат Самурхановайи ктибтнийи.
«Магьа цци, эвленмиш духьну, 18 йис вуйич. Гьамкьан йисарин арайиъ учу зат сар-сарихъди гъулхдар, элегдар дарча. Хулаъ узу фициб ляхин апIурашра, думу гьаммишан кюмекчи шуйзуз. УдучIвну увура саб ляхин апIин кIури, зат гъапир дариз. Гизаф ужур, гьюрмат апIру кас вуйи, саб хизандиз ваъ, вари мирас-варисдиз, гъуншйириз, дустариз.
Сакьюд йис улихьна уьзриан дада кечмиш гъахьиган, дугъан кIваз думу гьядисайи лап гужалди тясир гъапIнийи. Гьадму йигълан мина дугъан машнакк инчIкьан гъябкъюндайзуз. Адаш-дадайин, чвйир-чйирин гизаф гъайгъу кайир вуйи. Аварияйиъ юкьв-наз зиян дубхьну, чан кьялану гъардаш инвалидвалин коляскайиъ ахъу вахтна, думу сагъ апIуз кIури, Наврузбег фукьан зегьмет гизигнийи. Гьяйифки…
Дада кечмиш хьувалианра, гъардшиз зиян дубхьнайивалианра дугъу гъизигу дердерин шагьид узу вуза. Думу, чаз багъри инсанарихъанси, варидари-хъанди гьаци юкIв убгрур вуйи. Чан абйир-бабари аьхюр-бицIир ади, гьюрмат, уж’вал дапIну ккунивал аьгъяди, аькьюллуди тербияламиш гъапIу кас вуйи. Чухсагъул чпиз. Ич шубрид веледарра дугъу гьаци тербияламиш апIурайи. Амма кьисмат жараси гъабхьи», – гъапнийи Маринат Самурхановайи.
Ав, дурари 13, 11 ва 9 йисандин яшариъ айи шубур бай сатIиди тербияламиш апIурайи. Уьмриз аьхю планар дивнайи. Гьяйифки, гъи Урусатдин кьушмари гъабхурайи хусуси метлеб айи операция себеб дубхьну, абйир-бабар балихъ, веледар – адашдихъ, хъа уьмрин юлдаш – чан хизандин эйсийихъ мягьрум гъахьну.
«25-пи февралихъан мина дугъахъди аьлакьа имдайи. Гьар йигъан баяр, телефон хилиъ дибисну, адашдин зенгназ ккилигури деъну шуйи. Дина душну кьюд йигъ хьайизра, дугъаз мициб шул кIури, шлин хиял вуйихъа? Вахтниинди кюмек апIуз хъуркьнийиш, думу чIивиди гъуздийи. Лик ккадарди вушра кьяляхъ дуфну, баярин кIул’ин адаш илмийиш, баладайи», – пашманди аьлава гъапIнийи игитрин уьмрин юлдши.
Наврузбег Самурхановдин инсандихьна вуйи гьюрматнакан, дугъу инсанариз гъапIу уж’валнан ляхнарикан, дугъахъди таниш вуйи гьарсар касди тек-рар апIура. Мектеб ккудубкIну хайлин йисар гъушнушра, Хючна гъулан 1-пи нумрайин лицейдин мялимарира, Наврузбег кIваин апIури, думу фицир урхурайир вуди гъахьнуш, газатдиз мялуматар тувнийи. Варидари, йикьрар дапIнайиганси, Наврузбег Самурхановдин ужуб хасиятникан, дугъан тербияйикан ктибтура.
Урхурайи вахтна Наврузбег чаз туву табшуругъ дишлади тамам апIрур, жарадарихъанди юкIв убгрур вуйи. Думу таярин арайиан варибдин гъавриъ айи, нумуналу урхурайирси гъядягъюз шуйи.
«Наврузбеган хасиятнан гъиллигъар гьамусра кIваинди имийиз Думу 1-пи классдианмина юлдшарихъди албагну, аькьюллуди, гьаммишан жарарин гъавриъ ади урхурайир вуйи. Мектебдиъ фициб жюрейин серенжем гъабхурашра, душваъ думу лап аьхю аьшкьниинди иштирак шуйи. Гъи думу, мирас-варисдинси, дустаринси, мялимаринра ва мектебдиъ урхурайидаринра игит эскерси кIваинди гъузди. Дицдар, ухьу бадали чпин жанар фида гъапIу кIубан касар, аргъаж шулайи наслариз нумуна ву», – къайд гъапIнийи лицейдин директорин тербия тувбан ляхнариз лигру заместитель Ферман Аьзизовди.
Фукьан ухьу ккарагишра, фукьан гъишишра, сарун инсан кьяляхъ гъюрдар. Дадаси, Ватан ккун апIувалра гьарсар касдин буржи ву. Гъи, Ватан уьбхюри гъахьи, баярихъ мягьрум гъахьи бабар, йитим гъахьи веледар фукьан айкIан?! Гъит, дюн’яйиъ ислягьвал ибшри, чIуру хабрар хизанарихьан ярхла, дявйир кам ишри.
