Магьа майдин вазра улубкьура. Урусатдиъ майдин машкврар – агьалйир гьаммишан ккилигурайи хьадукран бицIи тятIилар ву. Майдин вазлиъ ляхниз дяргъру йигъариз гизафдари жюрбежюр планар йитIуру – рягьятвал гъадабгъуз, сейир апIуз, хъа гизафдар чпин гъулариз, дач-йириъ лихуз гъягъюру.

 

Майдин вазлиъ ихь уьлкейиъ аьдат вуди кьюб аьхю машквар къайд апIуру: Хьа-дукран ва зегьметнан йигъ (1-пи май), Гъалибвалин Йигъ (9-пи май). Машкврарин йигъар дилихру йигъарди мялум дапIна. 1-пи майдин йигъ элгьет йигъ’ин алабхъурайивализ дилигну, 2-пи майра рягьятвал гъадабгъру йигъси тувна. Гьаму йисандин 1-пи январин йигъра султ йигъ’ин алабхънийи. Думу йигъан ерина майдин 3-пи йигъ тувра. Хъа элгьет йигъ’ин алабхъу 2-пи январин йигъ 10-пи майдиз алдабгъну. Гьаци вуйиган, 30-пи апрелилан 3-пи майдизкьан, 7-пи майдилан 10-пи майдизкьан рягьятвал гъадабгъидихьа.