Аьдатнаъ абхънайиганси, гьар йисан апрелин вазлиъ ихь республикайиъ, гьадму гьисабнаан Табасаран райондиъра, субботникар кIули гъахуру. 22-пи апрелиъ райцентриъ ва райондин гъулариъ субботник кIули гъубшну.

 

 

Субботникдиз вари идар-йирин, тешкилатарин пишекрар, мектебариъ урхурайи баяр-шубар, мялимар удучIвнийи. Гьарсаб тешкилатдиз жа-жаради марцц апIуз йишвар улупнийи. Тешкилатарин пишекрари чпин идарйирин гьяятар, гъирагъ-бужагъар, райцентрин кьялан майдан, Гъалибвалин парк, спортдин мектеб къайдайиз гъахнийи. Райондин мектебариъра классар, урхбан идарйирин гъирагъ-бужагъар марцц гъапIнийи; гъуларин рякъяр къайдайиз гъахнийи. Гьацира гъелемар кивбан ляхинра кIваълан гьапIундайи. Гьамцдар субботникар райондиъ хъана кIули гъягъбанди ву.

Дурарин метлеб – гьарсаб идарайиз, тешкилатдиз райондин администрацияйи жара дапIнайи участокдиан зирзибил марцц апIуб, рукар-кюлер алдатIуб, гьарарин кьабар гьякухьди арсуб ва жара ляхнар тамам апIуб вуйи.

Табасаран райондин культурайин управлениейин гъуллугъчйири, райондиъ марццишин апIбан бадали, субботникар гъахбаъ кIакIначивал улупну. Дурари, Хючна гъулан кьялаъ айи парк зирзибилихьан марцц дапIну, вари чиркишин шишлариъ абхьну. Паркдилан илтIикIнайи мягьражар ди-жикIну, дурар лизи шир йивуз гьязур гъапIну.

Дупну ккундуки, улукьурайи аьхю машкврарин – хьадукран ва ислягьвалин машкврар вуйи 1-пи Майдин ва Ватандин Аьхю дявдиъ совет халкьди гъазанмиш гъапIу Гъалибвалин 77-йис хьпан – улихь ихь гъулар балгбаъ субботникарин роль аьхюб ву. Умуд кивдихьа, думу машкв-рариз вари гъулариъ кючйир, гъирагъ-бужагъар къайдайиз хиди.