Украинайиъ гъабхурайи хусуси метлеб айи операцияйихъди аьлакьалу вуди, ригъ алабхъру терефнан уьлкйири ва США-йи илитIнайи санкцйириз дилигди, Урусатдин Президентди машквран серенжемар ва военный парадар гъахуз къарар кьабул гъапIну. Коронавирусдин уьзур яваш дубхьнайивализ лигну, гьаму йисан «Аьжалсуз полк» акция аьдати жюрейиинди гъабхбанди гъахьну.
Гьацира «Аьжалсуз полк» акцияйин дахилнаъди Украинайиъ гъябгъюрайи хусуси метлеб айи дявдин операцияйиъ гъийихдарин гьюрматра уьбхиди.
23-пи апрелиъ Гъалибвалин Йигъ къайд апIбаз бахш дапIнайи серенжемар тешкил апIбан ва кIули гъахбан месэлйирин гьякьнаан вуйи совещаниейиъ Дагъустандин Глава Сергей Меликовди республикайин шагьрарин администрацйирикан Гъалибвалин Йигъан машквраз гьязурлугвалар гъахуз вахтниинди хъюгъювал ва Украинайиъ гъийиху эскрарин хизанариз артухъди фикир тувувал ккун гъапIну. «Гъи уьлке бадали чпин жанар диву касар 1945-пи йисандин гъалибчйирин ляхин давам апIурайидар ву. Дурарира фашизмдихъди вуйи женгнаъ чпин жанар дивну. Думу инсанар кIваълан гьархнадар, дурарин хизанар гьюкуматдин асас гюзчиваликк кка», – гъапну дугъу.
Дагъустандин Главайи гьаму йисандин жара важиблу гьядисйирикан – Ватандин Аьхю дявдиъ Кавказ бадали женг ккебгъну, 80 йис ва Каспийин флотилияйин 300 йис тамам шулайивал кIваин гъапIнийи.
Дагъустандиъ машквран серенжемар 21-пи апрелиъ Мягьячгъалайиъ «Гьюрматнан вахта» ачмиш апIбалан ккергъну. Гьацира думу йигъан Мягьячгъалайиз Ватандин Аьхю дявдин вахтарин «Гъалибвал» ретро-поездра гъафну. Региондиъ «Георгиевская лента» ва «Гьюрматнан багъ» акцйир кIули гъягъюра, майдин вазлин эвелариъ «Ветерандин хуларин улихь парад» ва «Гъалибвалин унчIвар» акцйирра гъахбанди ву.
Гъалибвалин Йигъан, аьдат вуйиси, азадвал гъабхи Эскриз дивнайи ядигарихъ ва респуб-ликайин меркездиъ эскрарин накьварихъ кюкйир дивувал, Каспийск шагьриъ военный парад гъабхувал, Ватандин Аьхю дявдин ветеранарин ва Украинайин аьтрафариин кIули гъабхурайи хусуси метлеб айи операцияйиъ гъийихдарин хулариз гъягъювал, вари Урусатдин «Аьжалсуз полк» акция гъабхувал планламиш дапIна.
Сергей Меликовди НС-дин депутатарикан ветеранариз гьар вазлиъ туврайи пулин кюмек артухъ апIувал ккун гъапIну. Гьамусяаьт Дагъустандиъ 29 ветеран яшамиш шула. «Дурар хъана артухъ гьюрматназ лайикь ву», – гъапну Дагъустандин Главайи.
Дидланра савайи, С.Меликовди ерли гьюкмарикан ветеранарин яшайишдин аьгьвалатназ артухъси фикир тувувал, дявдин ветеранар яшамиш шулайи хуларин улихьишвар, подъездар къайдайиз хувал ккун гъапIну.
Апрелин 21-пи йигъан гъубху ватанпервервалин «Гьюрматнан вахта» акцияйин дахилнаъди РД-йин Главайи «Гъалибвалин Пайдагъ» акция гъабхруваликанра гъапнийи.
«Гьюрматнан вахта» акция гъабхурайи вахтна, Ватандин Аьхю дявдиъ гъадабгъу ихь Гъалибвал машгьур апIбан бадали, ва Украинайин аьтрафариин хусуси метлеб айи дявдин операцияйин иштиракчйирин тереф уьбхюри, Гъалибвалин Пайдгъиз бахш вуйи серенжемар гъахуз къарар адабгъунча», – къайд гъапIнийи С.Меликовди.
Гъалибвалин Пайдагъ гьарсар дагъустанлуйиз гирами мутму ву. Рейхстагдиин Гъалибвалин Пайдагъ дивбан ляхниъ 150-пи стрелковый машгьур дивизияйиъ женг гъабхури гъахьи дагъустанлу Аьбдулгьяким Исмяилов иштирак гъахьну. Гъи Украинайин аьтрафариин гъябгъюрайи хусуси метлеб айи дявдин операцияйиъ иштирак шулайи 150-пи стрелковый жара дивизия тешкил дапIна. Душваъ гизаф дагъустанлуйири гъуллугъ гъабхура.
РД-йин Главайин теклифниинди тешкил дапIнайи Республикайин «Гъалибвалин Пайдагъ» акция апрелин 30-пи йигълан майдин 10-пи йигъаз гъябгъиди.
Образованиейин идарйи-риъ думу акцияйиз бахш дапIнайи ачухъ дарсар гъахиди; жюрбежюр интернет акцийирра тешкил дапIна. Шагьрарин ва гъуларин кючйир, хуларин машар, унчIвар хусуси метлеб айи лишнарихьди ккабалгиди.
