Жилиина инсаният халкь гъапIхъантина гъахьи гъизгъин дявйириъ жандиъ дагълу ифи либхурайи ихь ата-бабйири, дирбаш’вал, гьунарар улупури, Ватан, Руг, Халкь бадали жан фида апIури, гъалибвал гъазанмиш апIури гъахьну.
Гъира, Ватанди дих дапIнайиган, жюрэтлувал, игитвал улупури, ихь ватанагьлийири Урусатди Украинайиъ гъабхурайи хусуси метлеб айи операцияйиъ жвуван гъуллугънан буржи заан дережайиинди тамам апIура.
Гьаци намуслувалиинди Ватан бадали жанар диву игитарин арайиъ Хив райондин Мажвгул гъулан мектебдин выпускникар Гюльмягьямед Къалабеговна Кемран Гьяжимягьямедовра а.
Гьаму йигъари багъри мектебдиъ дурариз бахш дапIнайи «Игитарди бабкан шлуб дар. Дурар уьмри арайиз хуру» кIуру серенжем кIули гъубшнийи.
Серенжемдиъ мектебдин администрация, мялимар, 9-11-пи классариъ урхурайдар, Гюльмягьямеддин дада Наизат Къалабегова ва Кемрандин аьхю баб Гюльпери Гьяжимягьямедова иштирак гъахьнийи.
РФ-дин гимн йивбиинди серенжем абццри, Мажвгларин кьялан мектебдин директорин тербияйин ляхнариз лигру заместитель Мейлан Нежефовди урхурайидар Урусатди Украинайиъ кIули гъабхурайи хусуси метлеб айи операцияйин дюзди гъаврикк ккаънийи, думу гъабхбан асас метлебарикан ктибтнийи.
«Гьелбетда, деврин ва уьмрин чан хусуси тIалабар а. Ихь серенжем ккебгъруган узу гъапиганси, игитарди бабкан шлуб дар, дурар уьмри арайиз хуру. Гьаци гъи ихь уьмриз кьюрид выпускникар дуфна. Дурар ихь арайиан рягьматдиз гъушнушра, ихь кIваъ гьаргандиз игитарди гъузди. Гьаму йигъари багъри мектебдиъ дурариз бахш дапIнайи мурччв гьязур апIидихьа. Гъюзимбу наслари дурарин ччвурар гьюрматниинди уьрхиди ва гележегдиъ гъулариъ дурарин ччвурнахъ хъайи кючйир хьиди кIури, узу миж кивраза ва умудлу вуза», – къайд гъапIу Мейлан Нежефовди.
Урхурайидариз кьюрид Игитарин уьмрикан ва дурарин мектебдиъ урхури гъахьи вахтнакан мялимар Мевлюдин Аьлескеровди, Ших-эмин Мягьямедбеговди, Аьбдуляфис Атлухановди кьатI’иди ва мяналуди ктибтнийи.
Мектебдин директор Анвер Хидировди, мицдар гьунарлу баяр тербияламиш гъапIу абйир-бабариз мектебдин администрацияйин, мялимарин, техработникарин ва урхурайидарин терефнаан чухсагъул мялум апIури, сарун выпускникарин сиягь мициб саягъниинди давам дархьувал ккун гъапIнийи.
Серенжемдин вари иштиракчйир саб дакьикьайин арайиъ ккебехъну ликри гъудужвнийи.
«Баяр, Ватандин улихь чпин буржи дагъдин асланариси, завариин али люкьяриси ва жилиин игитариси тамам дапIну, уьмриан гъушнич. Закурин насларин умудлу, архаин ва нурлу йигъ бадали, Ватандиз баяр бахш гъапIунча. Гьацдар игит баяр гъахьунчухъ кIури, кIул за дапIну, гъи дурар игитарин цIарнаъ айич кIури, лицидича. Дурариз бахш дапIнайи дарс гьязур апIбаз учвузра чухсагъул ва гъи дурар кIваин апIбаз аферин», – гъапнийи Гюльпери Мукаиловнайи ва Наизат Севедуллагьовнайи.
Урхурайдари, игитарин шикларихъ кюкйир диври, доскайик гевюл марцци гьиссари, хиялари, фикрари, ниятари абцIнайич, алтIабгнайи укIу зав ккундучуз кIуру дикIбар кайи ислягьвалин луфарин десте кабснийи.
Гъит ихь урхурайидарин кIваъ айи хайирлу мурад-метлебар кIулиз удучIври!
