Фуну дявдира инсанарин юкIвариъ пашман ва дердлу шил гъибтру. Магьа Сефероварин кюлфетдин вакиларин ва жара ихь ватанагьлийирин юкIвариъра му дявдин шил гьаммишандиз гъубзди. Украинайиъ хусуси метлеб айи операция гъабхурайи вахтна, чпин гъуллугънан буржи тамам апIури йискьан бегьем дархьи, хизан ккебгъуз хътруркьу ихь жигьиларра, аьхю хизандин эйсйир вуйи жиларра, игитвалин ччвур гъадабгъну, уьмриан гъушну.
Ихь ватандин ислягьвал бадали чан жан фида гъапIдарин арайиъ Гьяжимурад Фарзялиевич Фарзялиевра а. Думу Хив райондин Фурдагъ гъулаъ бабкан гъахьну ва чан хизандихъди Дагъ.Огни шагьриъ дуланмиш шулайи.
Гьяжимурад Фарзялиев кIваин хури, Хив райондин администрацияйин культурайин, спортдин, туризмдин ва жигьиларин ляхнариз лигру отделин кIулиъ айи Казбек Къазиевди гьамци гъапнийи: «Гьяжимурад йиз варитIан багахьлу дуст, чве ва мирас, гъунши вуйиз, ва гьацира дугъахъди саб классдиъ сатIиди урхурира гъахьунча. Ав, Украинайиъ кIули гъягъюрайи гъагъи женгариъ дугъу ва имбу ихь эскрари улупурайи гьунарарин ва зигурайи зегьметнан кьимат аьхюб ву кIури, мялум апIура. Дурариз ухьу гьарган буржлу вухьа. Ва дурари улупу гьунарар ухьуз, гъийин деврин инсанариз, гьацира гъюру насларизра, нумуна гъахьну.
Гьяжимурад фунуб ляхин апIузра дирбаш’вал кайи игит кас вуйи. Узуз думу байвахтнахъанмина аьгъюр вуйиз. Дугъу чав туву гаф ва апIурза гъапи ляхин гьаммишан тамам апIуйи. Хъа гъи думу, дявдин гьяракатариъ жвуван эскарвалин буржи тамам апIури, аьхиризкьан Ватандин улихь чав туву гафназ дугъриди гъузну. Гьяйиф, дугъаз мициб ляхин хьуз. Ихь ватандиъ Гьяжимурадсдар игит баяр имиди, душмнарихьан дид’ин гъалиб хьуз хьибдар».
Урусатдин Президент В.В. Путинди адабгъу Указдиинди Гьяжимурад Фарзялиевдиз Кьягьялвалин орден тувну. Думу орден апрелин вазлиъ Дагъ.Огни шагьрин кIулиъ айи Жалаулдин Аьлирзаевди Игитрин хпирихьна ва дугъан балихьна гъурубкьну.
Кьягьялвалин орден, гьелбетда, варидариз тувруб дар, хъа Ростовдин областдиъ ерлешмиш дубхьнайи 91706 нумрайин дявдин частнаъ дявдиъ женг гъабхру машиндин командирди гъуллугъ апIури гъахьи Гьяжимурад, дугъриданра, дидиз лайикь вуйи.
Гьяжимурад Фарзялиевдин яш 42 йистIан дайи… Фукьан фикрар-хиялар, уьмрин ниятар кIваъ ади, думу уьмриан гъушну.
Гъи Гьяжимурад Фарзялиевдин ва имбу ихь игитарин гьунарарикан жигьил наслариз дарпиди гъитувал – ихь терефнаан аьхю гюрматсузвал хьибди, фицики дурарин игитвал ихь уьлкейин уьмриан ктIубшвуз даршлу муддат, ихь гьякьикьи тарих ву. Гъи Гьяжимурадлин хулаъ дугъаз ккилигури юкьюр велед ими. Мицир игит абайин веледариз уьмриъ хъуркьувалар, хъа дюн’йиъ ислягьвал хьувал ккун апIурхьа.
