Табасаран райондиъ майдин вазлиъ спортдин талитар кIули гъахувал аьдат дубхьна. Магьа 2022-пи йисанра, Аьхю Гъалибвалин 77 йис хьпаз тялукь вуди, душваъ майдин 4-диан 9-диз спортдин швнуб-саб жюрйириан талитар кIули гъушну. Дурар заан дережа-йиъди тешкил апIбан бадали, тешкиллувалин комитет ва спортдин гьарсаб жюрейиан жавабдар касар тяйин гъапIнийи.
Волейбол – райондиъ варитIан машгьур дубхьнайи спортдин жюре ву. Финалиъ шубупи йишв бадали Ругуж ва ЧвулатI гъуларин валейболин командйири уйнамишар кIули гъухну, натижайиъ 2:1 гьисабниинди ругжар гъалиб гъахьну. Сабпи йишв бадали варитIан гужли командйир – Къужникарин гъулан советдиз дахил шулайи Улуз гъулан ва Халгъарин гъулан советдиз дахил шулайи Бухьнагъ гъулан волейболистар талитназ удучIвну. Къайд апIуб лазим вуки, аьхиримжи 9 турнириъ гъалиб шули гъабхьи Къужникарин гъулан советдин командайиин Бухьнагъ гъулан жигьилар 2:1 гьисабниинди гъалиб гъахьну.
Натижайиъ волейболиан 1-пи йишв Бухьнагъ гъулан командайи, 2-пи йишв – Улуз гъулан командайи, 3-пи йишв – Ругуж гъулан командайи гъадагъну.
Футболиан кIули гъушу талитариъ 1-пи йишваз Къужник гъулан команда, 2-пи йишваз – Ягъдигъ гъулан команда, 3-пи йи-шваз – Хючна гъулан команда лайикьлу гъахьну.
Гьацира райондиъ столиин апIру теннисдиан, армспортдиан, пучIу атлетикайиан, гирйир за апIбаан, къуршагъ бисбаан, шашкйир ва шахматар уйнамиш апIбаанра талитар кIули гъушну.
Волейболин турнир ккудубкIбан кьяляхъ, райондиъ спортдин талитар хъяркьбаз бахш дапIнайи серенжем кIули гъубшну. Душваъ Табасаран райондин глава Мягьямед Къурбанов, РД-йин Халкьдин Собраниейин депутат Алавудин Мирзабалаев, райондин депутатарин Собраниейин председатель Иса Исаев, администрацияйин гъуллугъчйир ва жямяаьтлугъ тешкилатарин вакилар иштирак гъахьну.
Талитариъ гъалиб гъахьи вари спортсменар ва командйир медалариинди, дипломариинди, багьалу пешкешариинди ва кубокар тувбиинди лишанлу гъапIну.
Хянягъ гъулан имам Надир Зулфикьаровди волейболиан сабпи йишв гъадабгъу Бухьнагъарин командайиз пешкешди 10 000 манат тувнийи.
«Аьхю Гъалибвалин Йигъаз бахш дапIнайи майдин талитар – райондиъ варитIан машгьур талитар ву. Му талитар – спортдин жюрбежюр жюрйириан удукьувалар айидариз дурар ашкар апIуз мумкинвал туврайи спортдин фестиваль ву. Дурар кIули гъахбан аьдат советарин гьюкуматдин вахтарихъанмина давам шула, ва иштиракчйирин кьадарра йислан-йисаз артухъ шула. Насларихьан насларихьна рубкьури, му аьдат дубгуз гъитидархьа», – гъапну талитар хъяркьбан серенжемдиъ Мягьямед Къурбановди.
