2019-пи йисхъан мина Дагъустандиъ республикайин экономикайинна аьтрафарин артмиш’валин министерствойи тешкил дапIнайи «Ерли жягьтлувалар» программа уьмриз кечирмиш апIура.

 

 

Думу программайин асас метлеб – идара апIбан ерли органарин ва жямяаьтлугъдин инфраструктурайин гьял дапIну ккуни месэлйириз кюмек апIувал ву. Программа уьмриз кечирмиш апIбан бадали, гьар йисан республикайин бюджетдиан дакьатар жара апIура. Министерствойиан тувнайи мялуматариинди, программа уьмриз кечирмиш апIуз гьаму йисан 600 миллион манат улупна (2021-пи йисан 200 миллион вуйи).

Гъябгъюрайи йисан му программайиъ иштирак хьпан бадали, Дагъустандин 42 муниципалитетариан 200-кьан проектарин аьрзйир гъафну, ва улихьна йигъури гъалибчйир гъядягъбан натижйир гъивну кIури, республикайин экономикайинна аьтрафарин артмиш’валин министервойин пресс-гъуллугънаан хабар тувну.

Къайд апIураза, саб проектдиз варитIан заан гьисаб туврайи дакьатарин кьадар 10 миллион, хъа асскаан гьисаб – 1 миллион манат ву.

Программайиъ иштирак хьуз тувнайи 200 аьрзйирикан улупнайи вари шартIар гьял дапIнайидар 37 муниципалитетариан 128 проект вуйи. Гьадму гьисабнаъди 3 проект Табасаран ва 2 проект Хив районарианра гъалиб гъахьну.

Табасаран райондиан вуйи проектар:

– райондин библиотекйирин центральный гъурулуш капитально рас апIувалин проект – 7 705 130 манат;

– райондин жигьиларин гизаф гъуллугъар гьуркIру центрин дарамат капитально рас апIувалин проект – 4 979 790 манат;

– Хюрккарин гъулан поселениейиз дахил шулайи Пилгъарин гъулан культурайин хал капитально рас апIувалин проект – 2 322 830 манат жара гъапIну.

Хив райондиан вуйи проектар:

– Гъвандикк гъулан кючйир рас апIбан проект – 2 980 295,61 манат;

– Фурдгъарин гъулахъ цIа ктIубшвру пост дивбан проект – 2 миллион манат жара гъапIну.

Министерствойин пресс-гъуллугънаан къайд гъапIганси, программайиъ иштирак духьну, гъалиб гъахьи вари проекта, гьаму йисан аьхириз, янаки аьхълушнар ккергъайиз, кечирмиш апIувал чарасуз лазим ву.