Дагъустандиъ культурайин ва искусствойин цирклариан республикайин Главайин грантариз вуйи конкурсдиз аьрзйир кьабул апIура. Гьаддин гьякьнаан РД-йин Минкультурайин пресс-гъуллугъну мялум гъапIну.

 

Грантарин конкурсдин дахилнаъди дагъустандин культура уьбхюз, думу артмиш апIуз ва яркьуди тарабгъуз диш дапIнайи, милли уьмуми метлеб айи ва тажрубалу натижайихъна хру яратмиш’валин проектариз, ва гьацира режиссерарин, артистарин, художникарин, скульпторарин, музыкантарин, композиторарин, литераторарин яратмишариз кюмек тувбанди ву.

РД-йин Главайин Указдиинди, гьаму йисан культурайин ва искусствойин цирклариан 8 грантдиз уьмуми кьадар 3 050 000 манат жара дапIна. Дурар жюрбежюр номинацйириан тувиди: РД-йин яратмиш’валин коллективарин проектариз – 2 грант, гьарубдиз 600 агъзур манат; Дагъустандин милли культура артмиш апIбан ляхниз – 2 грант, гьарубдиз 350 агъзур манат; РД-йин культурайин ва искусствойин гъуллугъчйирин ляхниз – 3 грант, гьарубдиз 300 агъзур манат; гьамусдин деврин искусствойин цирклиан яратмиш’валин проектариз – 1 грант (250 агъзур манат).

РД-йин культурайин министерствойи Дагъустандиъ улупнайи цирклариъ ляхин апIурайи хусуси ва юридический касариз конкурсдиъ иштирак хьуз дих апIура. Гьарсар касдихьан кIул’инди вая яратмиш’валинна илимдин коллективдин дахилнаъди конкурсдиз саб аьрзатIан тувуз шулдар.

Документар «Йиз Дагъустан» порталиъ онлайн жюрейиинди 15-пи сентябриз тувуз шулу.