Уьлкейин вари мектебариъси, 21-пи майдиъ Табасаран ва Хив районарин ва Дагъустандин Огни шагьрин мектебариъра аьхиримжи зенг гъивну. Шадлугънан мяракйир шагьрин ва районарин кIулиъ айидарин, образованиейин управленйирин вакиларин, мектебарин мялимарин, урхурайидарин ва дурарин абйир-бабарин иштирак’валиинди кIули гъушну.
Цци Табасаран райондиъ аьхиримжи зенг 11-пи классдиъ урхурайи 382 ва 9-пи класс ккудубкIурайи 790 бай-шураз гъивнийи. Хючнаарин сабпи нумрайин лицейдиъ аьхиримжи зенг йивбан линейка майдин 19-диъ кIули гъубшнийи. Думу йигъан лицейдин гьяят жюрбежюр рангарин шарарихъди, пайдгъарихъди, плакатарихъди лап гюрчегди дабалгнайи. Му аьхю мяракайиз хилиъ кюкдин кунцIар ади дуфнайи баяр-шубартIан савайи, мялимар, абйир-бабар ва, Табасаран райондин глава Мягьямед Къурбанов кIулиъ ади, райондин руководствойин жара вакиларра дуфнайи.
Хючнаарин сабпи нумрайин лицейдин директор Жейран Къулиевайи чан удучIвну улхбаъ гьамци гъапнийи: «Гьюрматлу хялар, уч духьнайидар, асас вуди выпускникар. Гъи ихь сабпи нумрайин лицейдиъ 29 урхурайири 11-пи класс ва 35 урхурайири 9-пи класс ккудубкIура, дурар вари имтигьнариз деетна. Ццийин выпускникарин арайиъ гъизилин медалариз урхурайи 4 кас а. Учву аьхю уьмриз вуйи рякъюъ лик иврачва. 11 йисандин арайиъ учву аьгъювалар ва тербия гъадабгъу мектеб ва мялимар кIваълан магьаанай, ичв хъуркьувалариинди, инсанвалиинди дурар уткан апIинай. Гьарсаб гъайгъушнахьна кIул за дапIну гъягъюз аьгъю апIинай. Учвуз гьарсаб ляхниъ хъуркьувал ва ягъурлувал ибшри».
Выпускникар уьмрин важиблу вяда ккудубкIувалихъди Табасаран райондин глава Мягьямед Къурбановдира тебрик гъапIнийи. «Ичв улихь ярхи уьмрин рякъ хьа. Думу рякъ фициб шулуш, учвкан асиллу ву. Мялимари учвуз ерийин аьгъювалар, ужуб тербия тувувалиин шаклу дарза. Думу аьгъюваларин бина учву дюбхну ва давам дапIну ккунду. Ичв уьмриъ гьарган шаду йигъар хьувал, улихь хьайи имтигьнар ужудар кьиматариз тувувал ккун апIураза», – гъапнийи райондин кIулиъ айири.
Табасаран райондин главайин заместитель Заур Мусаевди лицейдиъ урхурайи Гюльназ Мутелимовайиз «Йисандин варитIан ужуди урхурайир» кIуру номинацияйиан райондин главайин стипендияйин сертификат тувнийи ва дугъан абйир-бабариз чухсагъул гъапнийи.
Серенжемдиъ абйир-бабарин терефнаан удучIвну гъулху Эрзиман Мустафаевди чпин бицIидариз аьгъювалар ва тербия туву мялимариз чухсагъул, гележегдиъра жигьил наслиз аьгъювалар тувбан рякъюъ заан хъуркьувалар ккун гъапIнийи.
Выпускникарира чпин терефнаан чпин сарпи мялимар вуди гъахьи Аида Гьяжиевайиз ва Аминат Балаевайиз, чпин классдин руководитель Замира Аьзизовайиз, имбу мялимариз ва лицейдин жара пишекрариз аьхю чухсагъул мялум гъапIнийи.
Серенжемдин аьхириъ лицейдиъ урхурайидари мяълийир, ялхъвнар гъапIнийи, шиърар гъурхнийи. Аьхиримжи зенг йивбахъди аьлакьалу шадлугъар кьаназ давам гъахьнийи.
***
21-пи май Хив райондин баяр-шубариз мектебдин бахтавар уьмриъ аьхиримжи зенг йивбиинди лишанлу гъабхьну. Саб жюрейинра читинваларикан фикир ктарди лицурайи выпускникариз гьамус гъизгъин вахт улубкьну: багахь вахтна дурарикан гьарсари, саб вуйи имтигьнар тувну, гележегдиз вуйи рякъ ктабгъиди.
Гъябгъюрайи урхбан йисан Хив райондиъ 105 касди мектеб ккудубкIура. Хъа дурарихъди сабси му зенг 9-пи класс ккудубкIурайи 233 касдиканра хайлиндариз аьхиримжинуб хьибди.
Улупнайи йигъан «аьхиримжи зенг» йивбаз тялукь машкврин шадлугъар райондин вари мектебариъ къайд гъапIну. Саки вари гъулариъ шадлугънан мяракйир администрацйирин вакиларин иштирак’валиинди кIули гъушну. Дурарикан гьарсари, выпускникар му машкврихъди тебрик апIури, гьарсар живан багъри гъулан, райондин, вари Урусатдин дамагъ ва даягъ шлувалик умуд киври, хайлин улхбар гъапIну.
Серенжемдин аьхириъ сабпи класс ккудубкIурайи бицIидари аьхиримжи зенг йивбиинди выпускникариз гележегдиз ягъур ккун гъапIну.
***
Дагъ.Огни шагьриъ 21-пи майдиъ аьхиримжи зенг 1-пи ва 3-пи нумрйирин мектебариъра гъивнийи. Дагъустандин Огни шагьриъ 1-пи нумрайин мектеб варитIан гизаф кьадар баяр-шубар урхурайибси гьисаб дапIна – мушваъ 1146 баяр-шубариз аьгъювалар ва тербия тувбиин 76 мялим машгъул духьна.
Линейкайиъ выпускникариз тебрикнан гафар дупну, 1-пи нумрайин мектебдин директор Низами Агъабеговди чпин мектебдиъ урхурайи баяр-шубарин, дурариз аьгъю-валар туврайи мялимарин хъуркьуваларикан гъапнийи, ва хъасин дугъу хайлиндар гьюрматнан грамотйир тувбиинди лишанлу гъапIнийи.
Директори къайд гъапIганси, 1-пи нумрайин мектебдиъ урхурайи 1146 баяр-шубарикан 246 отличникар ву. Цци мектебдиъ 9-пи класс 84 касди, хъа 11-пи класс 36 выпускникди ккудубкIура, дурарикан 6 гъизилин медаларин сагьибар ву.
Чан улхбан аьхириъ Низами Агъабеговди 11-пи класс ккудубкIурайи выпускникари ЕГЭ хъуркьувалиинди туврувалиин ва варидари аттестатар гъадагърувалиин учв умудлу вуйивал разиди къайд гъапIнийи.
3-пи нумрайин мектебдиъ аьхиримжи зенг йивбан йигъаз бахш дапIнайи серенжем 3-пи нумрайин мектебдин директор Мелекниса Халибеговайи ачмиш гъапIнийи, ва дугъу чан удучIвну улхбаъ сабпи нубатнаъди выпускникар аьхиримжи зенг йивбахъди тебрик дапIну, дурарикан ЕГЭ тувбаъ хъуркьувалар ккун гъапIнийи, ужудар аьгъювалар гъадагъуз баяр-шубари зегьмет дизигну ккуниваликан ва хайлин жара месэлйирикан гъапнийи.
Гъи 3-пи нумрайин мектебдиъ урхурайи баяр-шубарин кьадар 839 кас ву. 2022-пи йисан 9-пи класс 71 касди, хъа 11-пи класс 41 выпускникди ккудубкIура, дурарин арайиъ медалар гъадагъурайи 7 выпускник а.
Вахт дабгну, медализ мектеб ккудубкIурайи баяр-шубарихъди гюрюшмиш гъахьнийиза. Дурарикан сар дирбаш табасаран риш Лиана Ражабова вуйи. Лианайи чан улихь аьхю метлебар дивна – ЕГЭ хъуркьувалиинди тувувал ва медицинайин институтдик урхуз кучIвувал. Лиана ихь ватанагьли, шаир Идаят Аскеровдин худул ву. Белки, аьхю абайи Лианайиз бахш дапIну дибикIнайи шиърин цIарари дугъаз ужудар аьгъювалариинди мектеб ккудубкIуз тясир гъапIуншул?! Ав, дугъриданра, аьхюдари кIурайиганси, ужуди киву ва хъайивал гъапIу гьари фила-вушра бегьер тувди. Гъит Лианайиз хъана аьхю хъуркьувалар ишри.
Му мектебариъ кIули гъуху кьюбби серенжемаринра аьхириъ мектебарин художествойин самодеятельностдин кружокарин вакилари бицIи концертар улупнийи.
Шиклариъ: Аьхиримжи зенгназ бахш дапIнайи серенжемарин геренар: 1.Табасаран райондиъ; 2. Хив райондиъ; 3. Дагъ.Огни шагьриъ.
