Хив райондин глава Ярмет Ярметовдин ва ЦРБ-йин кIулин духтир Индира Багъичевайин буйругъниинди хусуси духтрарин бригадайи, сабпи нубатнаъ райондин бицIидарин багъариз ва мектебариз гъябгъюри, хъасин миди вуйи гъулан агьалйирин сагъламвал ахтармиш апIури, тяйин дапIнайи графикдихъди ва лазим вуйи къайдайиинди ляхин апIура.

 

 

Къайд дапIну ккундуки, духтрарин ахтармиш апIбариан мялум шулайиганси, гъи гьам бицIидарин багъариъ, гьамсана мектебариъ урхурайи баяр-шубарин уларин рябкъювал лапра кьитди ву. Гъуларин агьалйирикан кIуруш, ифдин анализ туври, дурар чпин ибариз деребхьрайивалин, кьамкьар иццурайивалин, сахари ва давлениейи чпи гизаф инжик апIурайивалин аьрзйир хьади духтрарихьна илтIикIнийи.

Зиихъ кудухнайи гъалабулугъвалин лишнар гьисабназ гъадагъури ва дурар гьял апIуз чарйир агури, духтрари ихь ватанагьлийирикан Хив ЦРБ-йиз гъюб, хъа бязидарикан, чпихьан направление гъадабгъну, вахтниинди Дербент, Дагъ. Огни, Мягьячгъала шагьрариз илтIикIуб ккун апIура.

КIваин апIуз ккундузуз, ккудушу кьюд-шубуд йисан коронавирусдин тIягъвни мицдар серенжемар гъахуз гъитрадайи. Хъа магьа гъи дидин ялав цIиб яваш дубхьнайиган, духтрари чпин ляхин давам ва райондин руководствойиан тувнайи бирмиш-буйругъ тамам апIура.

Гъуларин агьалйири, бицIидарин багъариъ ва мектебариъ лихурайидари райондин ва ЦРБ-йин администрацйириз чухсагъул мялум апIури, дурариз ляхниъ анжагъ хайирлу ва заан дережайин хъуркьувалар хьувал ккун апIура.

Хъа инсанари кIури шулу: «Эгер уьзри ккагъну, кетIерццну, дахъну-гьахъну хулаъ адми адарш, жвувандарикан аьзарханайиъ, дустагъдиъ ясана дявдиъ фужкIа-мужкIа адарш, думу инсандин бахт ву». Гъит му бахтнан лишан ухьуз гьарсариз кьисмат ибшри, гьюрматлу ярар-дустар!