Жигьиларин ляхнариз лигру Федеральный агентствойи жигьиларин проектарин конкурсдин натижйир гъивну. Дагъустандиан думу конкурсдиъ иштирак гъахьи 34 жигьили, конкурсдиз хътау чпин проектар уьмриз кечирмиш апIуз кюмек вуди, 41 миллионна 271 агъзур манатдин грантар гъадагъну.
Гъалиб гъахьи проектарикан 3 проект Табасаран райондиъ уьмриз кечирмиш апIиди: Аким Сяидялиевдин «Рубасдин мукьмар» кIуру Республикайин халкьдин яратмишарин фестиваль, Низами Агъаризаевдин Кьалухъ Мирзайин ччвурнаъ хъайи спортдин фестиваль ва Юсуф Аьлимягьямедовдин (шиклиъ) «Гележегдин мялим» кIуру семинар-совещание. Гьаму шубби проектариз 4 миллиондин грант тувну.
Дагъустандин Огни шагьриан грантарин сагьиб гъахьидар Хив райондин Зюрдягъ гъул’ан кючмиш гъахьи Максим Султанов ва Тамила Султанова ву. Дурари гьарури жа-жаради грантар гъадагъну.
Максим Султановдин проект – Интеллектдинна спортдин олимпиада -2022, хъа Тамилайин проект – СКФО-йин КВН-дин командйирин арайиъ гъабхру «Дуствалин кубок» кIуру регионарин арайиъ вуйи фестиваль ву.
Максимдин гафариинди, му проект гьар йисан уьмриз кечирмиш апIурайиб ву.
«Проектдиъ, мектебариъ урхурайидарилан гъадабгъну, чпин яш 35 йис вуйидариинакьан иштирак шула. Гьамусдиз учу проектдин дахилнаъди вуйи серенжемар Дагъустандин Огни шагьриътIан гъахури гъахьундарча. Цци думу серенжемариъ иштирак хьуз кьибла Дагъустандин муниципалитетаризра дих апIуз пландик кайич. Ужударсдар командйир гъядягъну, дурарин арайиъра премьер лигайин спортдин серенжемар гъахуз ккача», – гъапну Максим Султановди.
«Гележегдин мялим» кIуру семинар-совещание тешкил апIбан проектдиз грант гъадабгъу Юсуф Аьлимягьямедовди мялум гъапIганси, проектдин дахилнаъди августдин вазлиъ Табасаран райондин мектебариъ лихурайи 80-тIан артухъ жигьил пишекрариз дих дапIну, 3 йигъандин арайиъ семинар-совещанйир гъахиди. Думу серенжемариз жара йишварианра хялариз дих апIиди.
Дарпиди гъибтуз шулдар, вахтназ вуди Табасаран райондин жигьиларин центрин директорин вазифйир тамам апIурайи Юсуф Аьлимягьямедовди улихьнаси жигьиларин проектарин СКФО-йин конкурсдиъра 420 агъзур манатдин сабсана грант гъадабгъну. Дугъан «Спорт – сагъламвалин заминвал» кIуру проектдин асас метлеб жигьиларин арайиъ спортин серенжемар гъахувал ву.
