Улихьна йигъари Мягьячгъала шагьриъ айи Расул Гьямзатовдин ччвурнахъ хъайи библиотекайин конференцйир гъахру залиъ Республикайин культура, аьдатар ва халкьдин яратмиш апIбар уьрхбан Советдин заседание кIули гъубшну. Думу серенжем РД-йин культурайин министерствойи Республикайин халкьдин яратмиш’валин хулахъди сатIиди гьязур дапIнайиб вуйи.

 

 

Серенжемдиъ республикайин культурайин ва искусствойин цирклин улихь-кIулихь хьайидар, районарин культурайин управленйирин республикайин урхбанна методикайин центрарин кIулиъ айидар, РАН-дин ДФИЦ-дин, Урусатдин композиторарин Союздин Дагъустандиъ айи отделениейин вакилар ва гьацдар жарадар иштирак гъахьнийи.
Заседание РД-йин культурайин министрин заместитель, Республикайин халкьдин яратмиш’валин хулан директор Марита Мугадовайи ачмиш гъапIнийи.
«2022-пи йис РФ-дин Президентди Урусатдин халкьарин культурайин ирснан йисси мялум дапIна, ва ухьу республикайиъ вари серенжемар гьаддиз тялукь вуди тешкил дапIну ккунду. Вари халкьдин аьдатарин культурайин ва фольклорин «Дагълуйир» кIуру юбилейдин 20-пи фестиваль ЮНЕСКО-йин программайин дахилнаъди тешкил апIурайиб ву. Му фес-тиваль 29-пи июндиан 4-пи июлизкьан кIули гъябгъиди. Гьамусмиди фестивалихьна аьхю гьязурлугар гъягъюра. Цци «Дагълуйир» фестивалин дахилнаъди Мягьячгъалайиъ ва районариъ айи майднариин Урусатдин жюрбежюр йишвариан, харижи гьюкуматариан вуйи яратмиш апIбан коллективар, гьацира ихь республикайиан вуйи коллективар 20-пи ражари сатIи хьиди.
Районариъ ва шагьрариъ машквриз дуфнайи хялариз лазим вуйи кюмек дапIну, дурар ужуб дережайиинди кьабул апIур кIури, умуд кивдихьа», – гъапнийи чан улхбаъ Марита Мугадовайи .
Фестивализ Крымдиан, Осетияйиан, Чечен Республикайиан, Урусатдин саб хайлин регионариан, Индияйиан ва гьацира жара харижи уьлкйириан яратмиш апIбан коллективар гъиди. Думу делегацйир 29-пи июндиъ Мягьячгъала шагьриъ кьабул апIиди, хъасин жюрбежюр районариз пай апIиди. 3-пи июлиъ, вари коллективар сатIиди уч духьну, дурарин иштираквалиинди Мягьячгъалайиъ айи жюрбежюр майднариин аьхю концертдин программайин серенжемар кIули гъягъиди. 4-пи июлиъ думу серенжемдиз гъафи хялар кьяляхъ хътакиди.
Къайд дапIнайи серенжемдиъ фестивализ хяларди гъюрайи коллективар жюрбежюр районарин арайиъ пай гъапIнийи. Табасаран райондиз Индияйиан 20 касдикан ибарат вуйи коллектив 2-пи июлиъ гъибди. Диди Табасаран райондиъ чпин концертдин программара улупиди. Табасаран райондин культурайин идарйириъ лихурайидари дураризра ихь культурайикан, аьдатарикан, Табасаранарин хурагарикан ктибтиди, халачйир урхбан, гакIвликан ва рукькан алатар ктаъбан мастер-классар улупиди, мяълийир апIбан ва жара программйир тешкил апIиди. Гьацира хялар Табасаран райондиъ айи туризмдин объектарихъдира таниш апIиди.