«Табасарандин нурар» газатдин гьаму нумра асас вуди ихь бицIидариз бахш дапIнача, фицики июндин саддиъ Варихалкьарин бицIидар уьрхбан йигъ къайд апIура. Ихь уьлкейиъ бицIидариз, дурарин яшайишдиз ва дурарихъди аьлакьалу месэлйириз гьаммишан дикъатлу фикир тувра. Хъа гьаму йигъан уьлкейин вари йишвариъ бицIидариз бахш дапIнайи серенжемар кIули гъахувал аьдатнаъ абхъна.
БицIидар – ихь аку гележег ву. Гъийин бицIидарикан уьлкейин гележег асиллу шула. Дурариз ужуб образование, тербия тувувал – ихь асас вазифа ву. Гъийин девир улихьдинубсиб дар. Гьар йигъан фу-вушра цIийиб арайиз гъюра. Гьаддиз ухьу ихь бицIидар заманайин тIалабарихъди сабси артмиш шлуганси, хусуси уьмрикан фикир апIрударси, уьлкейин гъийин йигъхъан ва гележегдихъан жавабдарвал гъабхуз гьязур вуйи ватандашар шлуганси вердиш дапIну ккунду.
Улихьна йигъари Каспийск шагьриъ бицIидарин художественный гимнастика-йиан ачухъ вуйи талитар кIули гъушну. Гьадму талитариъ 7 йисан яшариъ айи Марьям Айдемировайи 1-пи йишв гъадабгъну. Учу, Марьям талитариъ гъалиб хьувалихъди, улубкьурайи бицIидар уьрхбан йигъахъди тебрик апIури, дугъан дада Наиля Айдемировайихъди гюрюшмиш гъахьунча ва дугъкан чан риш гьаму спортдиз фици гъафнуш, ктибтуб ккун гъапIунча.
«Марьям, Каспийск шагьрин бицIидарин 29-пи нумрайин багъдиъ тербия гъадабгъурайи вахтна, балетдин дарсариз гъягъюри гъахьну. Дугъаз муркларин кIакIариинди лицувал, жюрбежюр упражненйир апIувал гизаф кьабулди вуйи. Хулаз гъафиганра, жюрбежюр гимнасткйирин видеороликариз лигури, учвра жара шубар гъягъюрайи гимнастикайин мектебдиз гьаувал ккун апIури шуйи. Шуран яш йирхьуд йис гъабхьиган, думу Каспийск шагьриъ айи Кьурамягьяммедовдин спортдин мектебдин художественный гимнастикайин мялим Руслана Николаевнайихьна хъади гъушунза. Марьямдин удукьувалар гъяркъиган, тренери риш дишлади кьабул гъапIнийи. Шураз чан тренерра гизаф ккун гъахьнийи. Думу аьхю аьшкьниинди гимнастикайиин машгъул гъахьнийи. Кьюб вазлилан гимнастикайиан шагьриъ гъахьи талитариъ йиз шуру сабпи йишв гъадабгънийи.
Республикайин талитариъра сабпи йишвар гъадагъурайивализ лигну, Марьям республикайин сяргьятарилан тинди – Нальчикдиъ, Минеральные Воды шагьрариъ – гъахру талитариъра иштирак хьуз хъюгънийи. Гъубшу йисан Нальчикдиъ гъахьи талитариъра Марьямди сабпи йишв гъадабгънийи.
Урусатдин аьхю шагьрариъси дарди, ихь республикайиъ художественный гимнастикайиан ужудар тренерар адар. Тренерар вари жара йишвариан вахтназ вуди дуфнайидар шулу, гьаддиз кми-кмиди тренер гьюдюхбакк ккабхъру.
Майдин 29-пи йигъан Каспийск шагьриъ художественный гимнастикайиан ачухъ талитар кIули гъушнийи. Дурариъ Марьямди 1-пи йишв гъадабгънийи. Гьадму талитариз дуфнайи олимпиадайин чемпион Вера Бирюковайи Марьямдин, 2-пи ва 3-пи йишвар гъадагъу шубарин гарднариъ медалар ахьну»,
– разиди къайд гъапIнийи Наиляйи.
Учу редакцияйин терефнаан Марьямдиз мюгькам сагъ’вал ккун апIурача, гъит ихь риш художественный гимнастикайиан устад духьну, чан гардандиъ медаль абхъу чемпионкайисдар хъуркьувалар гъадагъну, багъри шагьриъ художественный гимнастикайин мектеб ачмиш дапIну, спортдиин юкIв али шубариз ужурсир тренер ишри.
Шиклиъ: Марьям Айдемирова олимпиадайн чемпион Вера Бирюковайихъди.
