Газатдин гьюрматлу юлдшар!

 

Учву Варихалкьарин бицIидар уьрхбан йигъахъди кIваантIан тебрик апIурача. Хьадан вазлин сабпи йигъан вари дюн’яйиъ ихь уьмрин варитIан аьхю девлет вуйи бицIидарин йигъ къайд апIуру. Дурарин гележег фициб шулуш, дурарикан фицдар инсанар ктучIвуруш, сифте хизандикан, хъа жямяаьтлугъдикан асиллу шула.

БицIи веледдин урхбаъ, спортдиъ, яратмиш апIувалиъ хъуркьувалар, дугъан бахтлу маш рякъювал – абйир-бабариз варитIан аьхю пешкеш ву. Гьюкуматди бицIидарин бахтлу уьмур тямин апIбан бадали вари шартIар арайиз хуз мумкинвал абгура. Абйир-бабарин, мектебдин, жямяаьтлугъдин метлеб – жвуван хизандиз гьюрматлу, Ватандиз вафалу, ла-йикьлу ватандашар тербияламиш апIувал ву.

Гьаму йисан Ватандин маракьар уьрхюри, Украинайиъ хусуси метлеб айи дявдин операцияйиъ гъийиху эскрарин гизаф бицIидар йитим гъахьну. Уьмрин читин аьгьвалатнаъ ахъу, абйир-бабар дарди гъузу бицIидариз асас фикир тувувал – гьюкуматдин, жямяаьтлугъдин вазифа ву.

Аьзиз дустар! Гъит Аллагьди ухьуз ихь бицIидар уьрхюз сагъвал туври, дурар варитIан бахтлу, ужуб кьисматнан эйсйир ишри, Первердигари ихь бицIидарихьан вари бала-кьазйир ярхла апIри, дурар Мугьяммад Пайгъамбрин (с.аь.в.) ккунивалин хлинцарикк ккаъну уьрхру агьларикан ишри. Ккергънайи хьадан тятIилар чпин кIваъ айиганси – акуди, шадди, ужудар дустарин арайиъ, гъулариъ айи ккуни бабарин мани марцарикк адаъруси ибшри.

Газатдин редакцияйин коллектив.

 

Шиклиъ: «Табасаран райондин гимназия» МКОУ-йиъ айи бицIидар