Милли меденият уьбхбан ва думу артмиш апIбан бадали, вари Урусатдиъси, Хив райондиъра натижалу серенжемар кIули гъахура. Гьаци, райондин гьюкмин кIулиъ айидари республикайин культурайин министерствойин кюмекниинди культурайин цIийи ужагъар дивбаз, айидар дибдиан рас апIбаз аьхю фикир тувра.
8-пи июндиъ Хив райондиъ райцентриъ ерлешмиш дубхьнайи бицIидарин искусствйирин хал ва Заан Ярак гъулаъ гъийин девриз тялукь культурайин хал ачмиш апIбан шадлугъар кIули гъушну.
Шадлугъар РД-йин культурайин министерствойин кIулиъ айи Зарема Бутаевайин, Хив райондин глава Ярмет Ярметовдин, РД-йин Халкьдин Собраниейин депутат Расим Гьяжиагъаевдин ва гьацира жара вакиларин иштирак’валиинди кIули гъушну.
Дуфнайи хялар къаршуламиш апIури, Хив райондин админинстрацияйин культурайин, спортдин, жигьиларин политикайин ва туризмдин отделин кIулиъ айи Казбек Къазиевди райондин бицIидариз ва Заан Ярак гъулан жямяаьтдиз тялукь пешкеш апIбак пай киву гьарсар касдиз чухсагъул мялум гъапIну.
Шадлугънан мяракайиъ сифте удучIвну гъулху райондин главайи, жямяаьтлугъдин яшайиш гъулай апIбан гъаразнаъ ади, Хив райондиъ гъахурайи ляхнарикан мяналу сюгьбат гъапIнийи.
«Урусат цIийи алапIбан, думу арт-миш апIбан рякъюъ аьхиримжи вахтари хайлин метлеблу программйир кьабул дапIна. Гьарсаб программа уьмриз кечирмиш апIувал агьалйирин яшайишдин гъаразнаъ айивалин лишан ву. Хив райондиъра духьнайи ужувлан дигиш’валарин вари шагьидар вухьа.
Райондиъ арайиз дуфнайи ужудар дигиш’валарин сиягь гъи республикайин Минкультдин «Гъулан культурайин хал» проектдин дахилнаъди дибдиан рас гъапIу Заан Ярккарин культурайин ва РДШИ-йин дараматари яркьу апIура.
Улупнайи тикилишар лап хатIалу гьялназ дуфнайивализ лигну, учу ккудубшу йисан дурар дибдиан рас апIбан йикьрар гъапIнийча. Натижйирира чпиз думукьан ккилигуз гъитундар. Тялукь серенжемари гъулан шартIариъ агьалйирин, асас вуди жигьиларин, артмиш’вализ цIийи рякъяр ачухъ апIбаз мумкинвал тувра. Гъит му гьяракатар гъуландариз, райондиз, вари Урусатдиз мянфяаьтлудар ишри!» – гъапну Ярмет Ярметовди.
Улхбан аьхириъ райондин главайи РД-йин культурайин министр Зарема Бутаевайиз, райондин меденият артмиш апIуз кюмекар тувбаз, Хив райондин администрацияйин терефнаан чухсагъул мялум гъапIнийи.
Райондин жямяаьтлугъ му шадлугъарихъди тебрик апIури, Зарема Бутаевайи чан нубатнаъ къайд гъапIну:
«Хив райондиъ культурайин цирклин артмиш’вализ тялукь фикир туврайивалиин узу кьадарсуз шад вуза. Ужувлан дигиш’валар хайлин а. Гьелбетда, камиваларра гизаф ими – дурар гьял апIуз гележегдиъра сатIиди зегьмет зигидихьа.
Гъи ухьу, республикайин культура артмиш апIбан милли проектдин дахилнаъди Заан Ярккарин СДК ва Хив РШИ рас дапIну, дурар ачмиш апIбан мярака гъабхурахьа.
Дурарилан савайи, аьхиримжи вахтна «Саб вуйи Урусат» партияйин «БицIи Ватандин меденият» проект-дин бинайиинди Хив РКДЦ-йин материалинна техникайин бина мюгькам дапIна. Багарихьди гьаму цIийи СДК-ра лазим вуйи техникайихъди ва аьлава мебелихъди тямин апIидихьа.
Къайд апIурза: республикайин саб жерге жара районарихь тевиш, Хив райондиъ культурайин циркил артмиш апIбаз ерли гьюкмин кIулиъ айидарира дикъатлу фикир тувра. Йиз гафар гьякьикьатди субут апIура.
Му райондин гьюкмин кIулиъ айидарин рюгьлувалин, ватанпервервалин лишан ву. Гъи Хив райондиъ милли меденият уьбхбаз, думу артмиш апIбаз лазим вуйи шартIар а. Чухсагъул гьарсариз! Учвуз хъанара хъуркьувалар ишри! Район авадан ибшри!» – гъапну министри.
Уч духьнайидар тебрик апIури, мяракайиин гьацира РД-йин НС-дин депутат Расим Гьяжиагъаев, райондин культурайин отделин кIулиъ айи Казбек Къазиев ва жарадар удучIвну гъулхнийи.
Чпин жямяаьтдиз тялукь шадвал багъиш апIбаз райондин главайиз ва му ляхник пай киву гьарсар касдиз чухсагъул мялум апIури, гъуландарин терефнаан мяракайиин Заан Ярак гъулан вакил Аьбдулгьямид Юсуфов ва гъулан поселениейин глава Сиражудин Сяидов удучIвну гъулхнийи.
Улхбарин кьяляхъ райондин культурайин саб жерге вакилар РД-йин культурайин министерствойин Гьюрматнан грамотйириинди лишанлу гъапIнийи.
