1-3-пи июлиъ Мягьячгъалайиъ «Foodstreet 2022» ччвур тувнайи хурагар гьязур апIбан сабпи аьхю фестиваль кIули гъябгъиди. Душваъ му цирклиъ ляхин апIурайи алверчйири чпикан мялум апIиди ва чпин итIру сурсатар арайиз адагъиди. Республикайин общепитдин 50-ртIан артухъ аьхю компанйири фестивалиъ иштирак хьуз разивал улупну.
Гьаддин гьякьнаан 22-пи июндиъ «Дагъустан» РИА-йиъ гъабхьи пресс-конференцияйиъ Мягьячгъалайин администрацияйин культурайин управлениейин аьхюр Фарид Абалаевди ва «Дагъустандиз гъягъювал» проектдин кIулиъ айи кулинарный судья Мягьяч Вагьабовди мялум гъапIну.
Тешкилатчйирин гафариинди, гас- трофестиваль Пушкиндин ччвурнахъ хъайи кючейиъ кIули гъябгъиди. Душваъ шагьристанариз ва дуфнайи хялариз мишленовский ресторанарин шеф-поварари хурагар гьязур апIиди. Фестивалин дахилнаъди поварарин арайиъ талитарра кIули гъягъиди. Поварарин дестйир кьюб сяаьтнан арайиъ кьюб хураг гьязур апIбан талитназ удучIвиди.
Садпи йигъан дурари пеълин йикк- кан хурагар ва дюгдин аш гьязур апIиди, кьюдпи йигъан – балугъикан, хъа шубудпи йигъан – каббар ва чарвайин йикккан хурагар. Дурарин ляхниз пишекар поварари кьимат тувди. Дурари, гьязур апIурайи хурагназси, поварин юрушдизра, марцциди хураг гьязур апIбазра ва думу улихь дивбазра фикир тувди.
Гьацира пишекарвал адру поварарин арайиъра талитар гъягъиди. Иштирак хьуз ккунидарихьан чпин хурагра хьади фестивализ гъюз шулу. Дурарин ляхниз жюрийи кьимат тувди.
Садпи йигъан гьацира журналистарин арайиъра каббар гьязур апIбан талит кIули гъабхбанди ву. Дурари, хурагра гьязур апIури, дидкан чпи макьалара бикIиди. Му серенжемдиз вари журналистариз теклиф апIура.
Фестиваль гъабхбан асас метлебарикан саб – ерли поварарин арайиъ дюзди хураг гьязур апIувал тарабгъуб ва улупуб ву.