Улихьна йигъари «Дагавтодор» ГКУ-йин кIулиъ айи Рустам Закариев ва дугъан заместитель Ханмягьмад Рягьимов Табасаран райондиз гъафну. Дурар Табасаран райондин глава Мягьямед Къурбановдихъди ва райондин 33-пи нумрайин ДЭП-дин кIулиъ айи Эседуллагь Аьбдуллаевдихъди райондиъ рякъяр апIурайи йишвариз лигуз гъушнийи.
Рустам Закариев ва Ханмягьмад Рягьимов райондиз гъюбан метлеб – муниципалитетдиъ гъахурайи рякъяр тикмиш апIбан ляхнар, хъа асас вуди йисариинди давам шулайи, рес-публикайин мяна айи «Мамедгъала-Хючна» рякъюн 16 – 28-пи километрин участокдиъ рякъ кивбан ва Дербент-Хючна рякъхьан Ягъдигъ гъулахьинди гъюрайи рякъюн 0 – 3 километриъ рас апIбан ляхнар фици кIули гъягъюраш ахтармиш апIувал вуйи. Му кьюбиб объектариин ляхнар «Дагавтодор» ГКУ-йи тамам апIура.
Дуфнайи хялар сабпи нубатнаъди «Мамедгъала–Хючна» рякъюк кабхърайи, гьамусяаьт ТIаттилна Дарвагъ гъуларин арайиъ дибдиан рас апIурайи рякъ ахтармиш апIуз гъушну. ТIаттилна Дарвагъ гъуларин арайиъ рякъюн участокдиин тикилишчивалин ляхнар гьеле 2021-пи йисан эвелариан ккергънайидар ву, амма рякъюн му пай яркьу, хъа рякъ дюз дапIну ккунивализ лигну, думу рякъ’ин кIули гъахурайи расвалин ляхнар гьамусра давам шули ими. Проектдин пландиз асас вуди, гьаму йисан аьхириз рякъюн му участок капитально рас апIбан тикилишчивалин ляхнар ккудукIиди.
«Мамедгъала–Хючна» рякъюн 16-28-пи километрин участокдиин гъахурайи расвалин ляхнариз лигбан кьяляхъ, Мягьячгъалайиан дуфнайи хялар райондиъ рякъ апIурайи тмуну объектдиинара гъушнийи. Къайд апIувал лазим вуки, рякъюн муну манзил «Дагавтодор» ГКУ-йин заказдиинди рас апIурайиб ву.
«Ягъдигъ гъулахьинди гъябгъюрайи 3 километрин рякъ рас апIуз лап гъагъиб ву. Му терефназди аьхю гъарзар айивализ лигну, рякъярин мяишатдин пишекрари, улупнайи нормативариинди рякъ цIиб яркьу апIбан бадали, гизаф зегьмет зигура. Гъагъи ляхин сарун аьхирихънара гъюра, анжагъ гъубзрайиб, рякъ дюз дапIну, душв’ин асфальт улубзувал ву. Думу ляхинра июлин аьхириз тамам апIиди. Рякъ рас апIбан кьяляхъ, дидиъди гъягъювал швнуб-саб ражари хатIасуз хьибди.
Хъа «Мамедгъала–Хючна» рякъюн гьякьнаан кIуруш, думу рякъ дибдиан рас гъапIган, Табасаран райондин агьалйириз республикайин жара районариз ва шагьрариз гъягъюз рягьятвал хьибди», – къайд гъапIнийи Мягъямед Къурбановди.
