Июндин 21-пи йигъан «Дагестанская правда» газатдин конференцйир гъахру залиъ Урусатдин Федерацияйи Украинайиъ гъабхурайи хусуси метлеб айи операцияйиъ гъийиху эскрарин хизанариз кюмек тувбан бадали ачмиш дапIнайи «Вари сатIиди» кIуру фонднан председатель Селимхан Мирзеханов ва РД-йин зегьметнан ва яшайишдин артмиш’валин министрин заместитель Мягьямедзагьид Кихасуров республикайин СМИ-йин вакиларихъди гюрюшмиш гъахьну.
КIваина хурача, гьаму йисан апрелин вазлиъ Дагъустан Республикайин Глава Сергей Меликовдин тешкиллувалиинди РД-йин зегьметнан ва яшайишдин артмиш’валин министерствойиъ гъийиху эскрарин хизанариз кюмек тувру фонд ачмиш дапIну,РД-йин Правительствойин терефнаан думу фондназ 50 миллион манат жара гъапIнийи. Думу жюрейин фонд уьлкейин жара регионариъ адар. Фонд гьюкуматдин ва хусуси касарин пулин дакьатарикан арайиз гъюрайиб ву. Дина пул хътапIуз фунур вушра касдихьан шулу.
Пресс-конференцияйиъ удучIвну гъулхдари гъийиху эскрарин хизанарин гьял дапIну адру месэлйирикан гъапнийи. Гизафдариз яшамиш шлу хулар адар. «ВаритIан асас вуди улихь дийибгънайиб яшамиш шлу хуларин месэла ву. Контрактдиинди гъуллугъ апIури, Украинайиъ гъийиху эскрар РФ-дин жара регионариъ гьюкуматдин хулариъ яшамиш шулайи. Эскрар йихьбалан кьяляхъ, дурарин хизанар Дагъустандиз багахьлуйирихьна гъюз мажбур гъахьну. Фондну арайиз гъюрайи месэлйир гьял апIбаз гизаф фикир тувра», — гъапнийи фонднан кIулиъ айири.
Селимхан Мирзехановдин гафариинди, республикайин гьарсаб муниципалитетдиъ гъийиху эскрарин гьарсаб хизандик агьалйирин яшайишдин тереф уьбхру центрин гъуллугъчйир китIна. «Дурари, кюмек ккун апIури, аьрза тувнайидариз лазим вуйи вари документар гьязур апIуз кюмек тувра. Аьрза фондназ дуфнура, МФЦ-йин офисдианра тувуз шулу.
Гьацира агьалйирин яшайишдин тереф уьбхру центрариъ гъийиху эскрарин хизанарихъди гьаммишан психологари ляхин гъабхура», – гъапнийи фонднан кIулиъ айири.
Гъийиху эскрарин хизанарин вакиларихьан гъафи вари аьрзйириз жаваб вуди, кюмекнан хил гьачIабккнийи.
Фондназ сарпирди Госдумайин депутат Султан Гьямзаевди пул хътапIнийи. Гьацира фондназ, хусуси касарихьанси, жюрбежюр тешкилатарианра, фирмйирианра пулин дакьатар гъюра. Чпихьан удукьрубсиб кюмек аьдати дагъустанлуйирира апIура. Сар пенсия гъадабгъурайи яшлу касди фонднан счетназ чан терефнаан 500 манат хътапIну. Гьацдар инсанар цIиб адар. Фонднан кIулиъ айидари дицисдар касариз аьхю чухсагъул мялум гъапIнйи. Гъийин йигъаз фонднаъ 35 миллион манатдин дакьатар уч духьна.
«9-пи майдин машквриз Украи-найиъ гъийиху эскрарин гьарсаб хизандиз 20 агъзур манат тувну. ЦIиб кьандиси, фонднан тешкилатчйирин къарарназ асас вуди, гъийиху эскрарин гьарсаб хизандиз 1 миллион манат жара гъапIну»,- гъапнийи С. Мирзехановди.
Региондин кIулиъ айири Да-гъустандин Правительствойиз гъийиху эскрарин бицIидарин тереф уьбхювалин гькьнаан улчмйир кьабул апIувалра табшурмиш дапIна. Пресс-конференцияйиъ гьацира гъийиху эскрарин бицIидариз образованиейин цирклианра кюмек тувуваликан гъапнийи: дурар вузариз кьабул апIбан шартIар рягьят апIиди.
