Гъябгъюрайи йисан 5-пи апрелиъ Дагъустандиъ пулсузди яшайишдин газдихъди тямин апIбан программайиъ иштирак шулайи ветеранариз, инвалидариз, гизаф бицIидар айи хизанариз, сарди яшамиш шулайи пенсионерариз льготайин жюрейиинди газ зигбан авадлугъар, алатар масу гъадагъуз ва кючейиан хулазкьан газ зигуз пулин кюмек тувбан гьякьнаан къарарихъ Дагъустандин Правительствойин председателин заместитель Руслан Аьлиевди къул гъизигнийи.

 

Думу къарар адабгъхъанмина яшайишдин газдихъди тямин апIбан программайин дахилнаъди Дагъустан Республикайиъ 352 хулариз пулсузди газдин турбйир гъизигну. Гьадму гьисабнаан льготйир айи агьалйиризра.
Чпин хуларихъна газ зигбан бадали, республикайин энергетикайин ва ЖКХ-йин министерствойиз 2 агъзурна 500 дагъустанлуйирихьан аьрзйир дуфна кIури, му идарайин пресс-гъуллугънан начальник Наталья Гьяжиевайи «Табасарандин нурар» газатдиз мялум гъапIну.
Дугъу туву мялуматариинди, таза турбйир газ гъябгъюрайи турбйирик китIбан бадали, министерствойи газдин мяишатдин тешкилатдихъди 1588 хуларихъна газ зигуз йикьрар йитIна. Гъийин йигъаз гьадму кьадарнакан 352 хуларихъна сарун газ дизигну ккудубкIна.