17-пи июндиъ Мягьячгъала шагьриъ, медицинайин гъуллугъчийин Йигъаз тялукь вуди, Дагъустан Республикайин Халкьдин Собраниейин сагъламвал уьбхбан, зегьметнан ва яшайишдин политикайин комитетдин председатель Ильяс Мамаевди Улуз гъулан ФАП-дин заведующий Сулейман Сулейманов Халкьдин Собраниейин председателин терефнаан хилихъ хъапIру сяаьт тувбиинди лишанлу гъапIну.
Сулейман Сулейманов 1968-пи йисан 15-пи июлиъ Табасаран райондин Улуз гъулаъ бабкан гъахьну. 1985-пи йисан Къужникарин кьялан мектеб ккудубкIну, 1986-пи йисан думу Ивановский областдин Шуя кIуру шагьриъ айи медучилищейик урхуз кучIвну. Медучилищейиъ урхури имиди, 1986-1989-пи йисари Кафари флотдин гимйириъ медицинайин гъуллугънан начальникди армияйин жергйириъ гъуллугъ апIури гъахьну. 1990-пи йисан медучилищейиъ урхувал давам дапIну ккудубкIну. 1991-пи йисхъан мина гъийин йигъазкьан Улуз гъулан ФАП-дин заведующийди ляхин апIура.
Му касдиз 2009-пи йисан «РД-йин сагъламвал уьбхбан отличник» кIуру ччвурра тувна. Думу гьацира Дагъустан Республикайин сагъламвал уьбхбан минис-терствойин Гьюрматнан грамотйир, Табасаран райондин руководствойин терефнаанра хайлин дипломар, грамотйир ва багьалу пешкешар тувбиинди лишанлу дапIна.
Жвуван ляхин гизаф йисари лап юкIв хъади, аьхю жавабдарвалиинди апIурайивализ лигну, Сулейман Гьяжиисаевич лишанлу апIбан бадали, Табасаран райондин ЦРБ-йин кIулин духтир Абсередин Мирзабеговди Дагъустан Республикайин Халкьдин Собраниейиз дугъан лазим вуйи документар хътаъну. Гьаци му кас улихьна йи-гъари РД-йин Халкьдин Собраниейин председателин терефнаан Ильяс Мамаевди лишанлу гъапIну.
Сулейман Гьяжиисаевич – гъи Табасаран райондин гъулариъ лихурайи адлу духтрарикан сар ву. Думу фурс ктру, чан ляхнин важиблувалин гъавриъ айи, жумарт юкIв айи кас ву. Сулейман Сулейманов жямяаьтлугъ ляхнаринра кIакIнаъ ади шулу.
Ав, гьелбетда, ухьуз мялум вуйиганси, аьзарлуйириз дивру диагноз духтри гъахру ахтармиш’валарикан асиллу шула. Гьаци вуйивализ лигну, медицинайин пишекрар чпин ляхнихьна жавабдарвалиинди янашмиш хьуз мажбур шулу. Сулейман Гьяжиисаевичди чаз айи вари аьгъювалар ляхниъ ишлетмиш апIура. Чан ляхин лап дикъатлуди, жавабдарвалиинди апIурайивализ лигну, инсанар му духтрин ляхниинра лап разиди ву. Думу касдихьна жара гъуларианра хайлин аьзарлуйир илтIикIури шулу. Чаз айи заан аьгъювалариинди агьалйир сагъ апIури, дурариз лазим вуйи дармнар дикIури, инсанар ужуб рякъ’ин алаури, Сулейман Сулеймановди йигъ-йишв дарпиди зегьмет зигури шулу.
Гъит мицдар пишекрариз чпин читин ва жавабдар ляхниъ аьзарлуйирин гъуллугънаъ хьуз сагъ’вал туври.
