Мялум вуйиганси, гьамусяаьт вари ихь уьлкейиъ, гьадму гьисабнаан Дагъустандиъра, 8 йислан 17 йис’ина яшар духьнайи баяр-шубар айи, касибвал кайи хизанарин бицIидариз пособйир гъюбан бадали, гьяракатниинди аьрзйир тувра. 8 йислан 17 йис’ина яш дубхьнайи бицIидариз гьар вазлиъ пособие тувувал – му хизандин гьарсар касдиз алабхъурайи гъазанж тялукь региондиъ яшамиш хьуз улупнайибтIан цIибди вуйи абйир-бабариз кюмек апIбан бадали, гьюкуматдин терефнаан кьабул дапIнайи уьлчме ву. Гьелелиг му месэла гьял апIбаъ аьдати инсанариз гизаф читинвалар алахьура, сасдар касар думу пособие фици гъадабгъуруш, ужуди гъавриъ ахънадар.
Дагъустан Республикайин зегьметнан ва яшайишдин артмиш’валин министерствойиан тувнайи мялуматариинди, зиихъ улупнайи яшарин бицIидариз гьаму пособие гъюбан бадали, дурарин абйир-бабариз официально вуди гъазанж гъюради ккунду. Думу гъазанжси пенсия, маважиб, стипендия, алверчивал апIбалан ва жвув ляхнихъди тямин дапIнайивалилан гъюрайи гъазанж гьисаб апIура. Гьар вазлиъ туврайи пособиейин кьадарра хизандиз гъюрайи гъазанждикан асиллу шула.
Эгер сад йисандин арайиъ, гьякьлу себеб ади, хизандиз гъазанж гъафундарш, дицдар касариз пособйир тувуз ихтияр а. Хизандиз гъюрайи дакьатариз лигну, пособйир тувбан яшарикк ккуркьнайи бицIидариз дидин 50%, 75% ва 100% тувра. Пособие сад йисазди тяйин апIура ва аьрзайиинди думу тувувал давам апIура.
Мягьячгъала шагьриан вуйи кьюр веледдин дада Диана Керимовайи му пособйир чаз гъюрайивалиин разивал улупурайи. Дугъан гафариинди, гъийин девриъ заводдиъ ляхин апIурайи касдин хизандиз гъюрайи гъазанж лап цIиб ву.
«Узу сарди веледар уьрхюрайир вуза. Лихурайи йишв’ан узуз гъюрайи гъазанж ич хизандиз гьубкIрадар, янаки пособие учуз дуфну ккуниваликан мялум вуйзуз. Гьаддиз, лазим вуйи документар уч дапIну, шубуб ражари МФЦ-йиз аьрза тувунза. Саб себебра адарди, 10 йигълан аьрза кьяляхъ апIури гъахьну. Сарун гьапIруш аьжуз гъахьири, Пенсйирин фонднан «горячая линияйиз» дих дапIну, йиз аьрза кьабул апIруганси гафар гъапIунза. Эгер узу дина дих гъапIундайиш, йиз аьрза кьабул апIудайи. Магьа гьамус йиз веледариз гьаруриз 75% пособйир тувруганси документар гьязур гъапIну. Гьадмура хизандиз саб аьхю кюмек ву. Мектебдиъ дарсар ккергъру вахтназ му пул абйир-бабариз завариан абхъубси хьибди», — гъапну йиз сюгьбатчийи.
Ав, гьарсар кас чаз айи ихтиярарин гъавриъ ади ккунду. Гьаму Дианайинси аьрза кьяляхъ апIурайи касар хайлиндар а. Эгер му месэла гьял апIбахъ думуси жанлуди, ижмиди хътрюгъиш, дуфну ккуни пособие тутрувуб мумки ву. Гьаддиз, 1-пи октябрь хьайиз вахтниинди аьрзйир тувну, ичв веледариз рубкьру кюмек гъадабгъуз чара апIинай.
