28-пи июндиъ Мягьячгъалайиъ, РД-йин писателарин союздиъ жигьил шаирарин III форум ачмиш гъапIну. Душваз республикайин милли чIалариинди чапдиан удучIвурайи жюрбежюр газатар-журналарин редакторар, шаирар, мялимар ва шаирвалин рякъюъ тазади ликар алда-гъурайи жигьилар уч гъахьнийи. Форумдин метлеб – жигьил шаирарин ва писателарин удукьувалар ачмиш апIувал, тажрубалу шаирари ва прозаикари мастер-классар, семинарар гъахувал, союздин милли чIаларин секцйирин кIулиъ айидари дурарин ляхниз кьимат тувувалиинди, ужударстар арайиз адагъувал вуйи.
Серенжем ачмиш апIури, РД-йин писателарин союздин председатель Мягьямед Агьмедовди къайд гъапIганси, милли чIалариинди яратмиш апIурайидари лапра важиблу ляхин гъабхура, фицики дурари багъри чIалар уьрхбак ва артмиш апIбак аьхю пай кивра.
Форумдин ляхин ноябрин вазлизкьан давам хьибди. Гьаму вахтнан арайиъ РД-йин писателарин союздин электрондин почтайиз хътау материалар ахтармиш дапIну, дураригъян варитIан ужударстар гъядягъиди. Гъалиб гъахьидари йискьубан арайиъ РД-йин Главайин ччвурнахъан вуйи стипендия гъадабгъиди.
Мидланра савайи, РД-йин писателарин союздин председателин заместитель Марина Аьгьмедова-Колюбакинайи, гъядягъю ужударстар шиърар урхрударин арайиъ яркьуди тарагъбан бадали, дурар чав пулсузди урус чIалназра таржума апIурза кIури, гаф тувнийи.
Форумдин иштиракчйирин яш 13 йислан 35 йис’ина вуйи.
Форумдиз дуфнайидарин арайиъ, гьяйифки, табасаран чIалниинди бикIру жигьил шаирар адайи. Хъа ухьузра дурар ахьуз, ва литературайин майдандиин тазади ликар алдагъурайидариз кюмек тувувал — ихь багъри чIал уьбхбак пай кивувал ву.
