28-пи июндиъ Мягьячгъалайиъ айи «Урусат – йиз тарих» тарихнан паркдиъ, «Дагъустандин риш вуза, Зурба Урусатдин!» ччвур тувну, Фазу Аьлиева бабкан духьну 90 йис хьпаз бахш дапIнайи дагълу шубарин съезд гъабхьну. Думу серенжемдиъ республикайин милли политикайинна диндин ляхнариз лигру министр Энрик Муслимов, Дагъустандин жигьиларин ляхнариз лигру министр Камил Сяидов, республикайин Халкьдин Собраниейин депутат Елена Павлюченко ва хайлин жара касар иштирак гъахьну.
Шаирин юбилейиз бахш дапIнайи серенжем бабан чIалариинди Фазу Аьлиевайин шиърар урхбиинди ккебгънийи.
Энрик Муслимовди, уч духьнайидарихьинди илIикIну, тебрикнан гафар гъапIнийи ва Дагъустан Республикайин дишагьлийирин союздин председатель Интизар Мамутаевайиз, Украинайиъ кIули гъябгъюрайи хусуси метлеб айи операцияйиъ иштирак шулайи Дагъустандин эскрарин дадйирихъди ляхин гъабхурайивализ лигну, генерал-полковник Михаил Мизинцевдихьан чухсагъул мялум апIбан кагъаз тувнийи.
Чан нубатнаъ Камил Сяидовди серенжемдиъ айи дишагьлийириз гьамусяаьт республикайиъ аргъаж шулайи насил ужуди тербиямиш дапIнайиваликан гъапнийи.
«Ихь гележег жигьиларикан асиллу ву, хъа дурар лазим вуйи саягъниинди тербияламиш апIувал – дишагьлийирикан. Гьаддиз, кIваинди гъибтай, учву ичв веледар фици тербияламиш гъапIиш, ихь республикайин артмиш’валра гьациб хьибди. Гьамусдин вари жигьилар абйирин аьдатар, гъиллигъар уьрхюри тербияламиш дапIайидар ву», – къайд гъапIну министри.
Сережемдин иштиракчйири гьамусяаьт Украинайиъ кIули гъябгъюрайи хусуси метлеб айи дявдин операцияйиъ иштирак шулайи ихь баяр ва дурарин дадйир швнуб-саб ражари кIваин гъапIнийи, ва ихь баяри Ватан бадали улупурайи гьунарарикан ктибтнийи.
Серенжем аьхирихъна гъюри, республикайин машгьур артистари Фазу Аьлиевайин гафариз вуйи мяълийир, хъа «Лезгинка» ансамблин артистари ялхъвнар гъапIнийи.
