Хьад – ляхнариъ айи инсанари отпускар гъадагъру, бицIидарихъди гьюлихъна, яркврариз рягьятвал гъадабгъуз гъягъру мани вухт ву. Иллагьки ихь республикайиъ Каспий гьюлин гъирагъар рягьятвал гъадабгъурайи агьалйири, жара йишвариан дуфнайи туристари ва дурарин бицIидари хъацIна. Аммаки аьхю кьадар инсанар штун хатIалувалин вари сабси гъавриъ адар. Гьацдар дюшюшар шулуки, бицIир ваннайиъ айи штукк ккахъру. Гьюлин шту фукьан бицIидарин ва аьхюдарин уьмрар гъухну.
Гъубшу гьяфтайиъ Мя-гьячгъалайиъ гьюлик жи-кIурайи кьюр бицIир – 15 йисаъ айи бай ва 14 йисаъ айи риш – гьюликк ккахъну. Думу бедбахтвал Мягьячгъала шагьрин Кировский райондин аьтрафариин ерлешмиш дубхьнайи «Березка» пляждихъ лисхъан сяаьт юкьбариъ гъабхьиб ву. Мягьячгъалайин БПСС-дин кюмекчйири риш гьюлккан ккадагънийи, амма думу гъакIнийи. Балин майит абгувал давам гъапIнийи.
Веледдин дерд аьхюб ву, гъийихдарин абйир-бабариз сар Аллагьди сабур туври.
Думу йигъан гьюлиин аьхю лепйир алийи. БицIидарин фикир аьхюдаринси мюгькамуб дар. Гьаддиз гьюлиин леп-йир али вахтна гьюлихъна бицIидар хъади гъягъювал, мидланра савайи, дурар гьюлин штук кучIвуз гъитувал – аьхюдарин тахсир ву.
Гьяйифки, бицIидар, чпихъди гьюлихъна дуфнайи аьхюдарин гюзчивал зяиф хьувалин вижнасузвалиан кми-кмиди инсанарин арайиъ гьюликк ккахьри, дургури шулу.
Йиз гъуншди ктибтури шуйи: «Гьюлихъна бицIи ришра хъади жигьил дишагьли дуфнайи. БицIири гьюлин гъирагъдихъ тамшир апIурайи. ЦIиб арайилан чахь хьайи уюнжагъар гьюлин гъирагъдихъ дирчну, риш гъудургнийи. Жигьил дишагьлийи риш агуз хъюгъру. Дугъу, риш гьюликк ккахъну кIури, гьарйир апIурайи. Багахь хьайи жигьил баяри гьюлин гъирагъдихъ хъайи вари шид асккан-заан гъапIнийи. Амма бицIи риш гъидихъундайи. Бахтнаанси, бицIи риш сагъ-саламатди имийи. Думу, чан дадайихьан ярхлаз душну, бицIидарихъди тамшир апIури дуснади гъахьну».
Гьюлихъна гъафидари тамам дапIну ккуни къайдйир а: ичв бицIидар улариккан маккадаанай; пляждихъна гъафиган, гьюлихъ хъайидариз кюмек тувру пост наан хьаш аьгъю апIинай; бицIир штук кучIвруган, дугъ’ин ил тIапIнайи жилет алабхьай.
Гьюрматлу абйир-бабар! Гьелбетда, вари дюшюшар Аллагьдин кьадар ву. Хъа, эгер ихтиятвал гъапIиш, Аллагьра кюмек шулу. Хьадан вахтна гьюлихъна бицIидар хъади дурушди гъузуз шулдар. БицIидарин гуж аьхюб шулу. Гьюлихъ мугъаятвал мудубганай, ичв бицIидар гьаммишан мюгькам гюзчиваликк гъитай.